Grupu Juventude Rejiaun Administrativa Espesiál Oé-Cusse Ambeno (RAEOA) konferénsia imprensa , segunda (23/08). Imajen Tatoli/Arminda Fonseca

DILI, 23 agostu 2021 (TATOLI)-Grupu Juventude Rejiaun Administrativa Espesiál Oé-Cusse Ambeno (RAEOA), husu ba  Isabel da Costa Ferreira, atuál espoza Primeiru-Ministru (PM), Taur Matan Ruak, atu kandidata-an ba eleisaun Prezidente Repúblika 2022.

Notísia Relevante : Atoni-oan sira husu Lú-Olo re-kandidata ba PR 2022-2027

“Hanesan ita hotu hatene katak lakleur tan ita sei hakat ba festa demokrasia ne’ebé ita sei festeja iha tinan 2022, kona-ba eleisaun Prezidente Repúblika ba periodu tinan lima 2022-2027. Ami hosi grupu juventude RAEOA ho hakarak tomak, husu no apoia Dra. Isabel da Costa Ferreira, atu kandidata-an ba Prezidente Repúblika, tanba  23/08/2021ami  prontu hodi manifesta ami-nia apoiu tomak ba kandidatura Dra. Isabel da Costa Ferreira ba iha eleisaun Prezidente Repúblika 2022,” koordenadór grupu Juventude RAEOA, Osório Martins Suni, hateten liuhosi konferénsia imprensa ne’ebé hala’o iha restaurante de Doce Tentação (Benfica Dili), segunda ne’e.

Razaun  ne’ebé pontu kulminante, hodi eleva sira atu husu no apoia ba Isabel da Costa Ferreira kandidata ba Prezidente Repúblika ne’e mak hanesan futuru rai ida ne’e nian, Juventude RAEOA konsiente katak kostume-aat liu iha Timor maka kultura vingativu hodi hamosu problema iha setór sosiál oin-oin.

Ho razaun ida-ne’e maka grupu juventude RAEOA, hanoin katak, ema ne’ebé atu sai Prezidente Repúblika, tenke mai ho kandidatura independente no tenke feto, hanesan kandidatura independente Dra. Isabel da Costa Ferreira hanesan feto ne’ebé iha kapasidade atu asegura unidade nasionál no Konstituisaun RDTL hodi lori hikas timoroan hotu ba prosperidade.

Sira konsidera katak Isabel da Costa Ferreira, iha esperiénsia pasadu hanesan ema ativista ida ne’ebé dezde uluk sempre luta maka’as ba direitu umanu tanba ne’e hanesan kandidatu feto ida ne’ebé iha kapasidade di’ak, atu responsabiliza funsaun hotu ne’ebé nia kandidatu-an ba hanesan Prezidente Repúblika.

“Ami juventude mós hanoin katak, Dra. Isabel da Costa Ferreira mai ho personalidade no karater ne’ebé nakonu ho valór sira hanesan; solidariedade, karidade, onestidade, tolerante, moris ho domin, paz no seluk tan. Valór hirak ne’e refleta tebes no kondíz tebes ho timor-oan sira nia mehi hodi tau iha prátika, ida nee mak timor-oan sira hein hela la’os ho promesa falsu sira,” nia dehan.

Nia dehan, iha momentu krusiál ida ne’e sira mós hanoin katak pertinente tebes atu tau iha istória Timor-Leste bá kandidatura Prezidente Repúblika RDTL ne’ebé mai ho jéneru Feto. Feto ida ke mai ho kapasidade plena, abilidade di’ak, kompeténsia no integridade ne’ebé kle’an.

“Iha sorin seluk ita nia nasaun presiza kandidatura ida iha sentimentu hanesan inan ida. Tanba povu no rai doben ida-ne’e la’ós presiza de’it ema ukun
ho kapasidade, maibé mós fuan ka sentimentu, tanba ita hateke ba pasadu númeru kandidatura ba Prezidente Repúblika mane maka barak liu, mak okupa, tempu to’o ona atu ita promove igualdade jéneru iha Timor-Leste, tanba ne’e, ami husu no apoia Dra. Isabel da Costa Ferreira atu kompete no kompleta hanesan kandidatura independente, atu nune’e, bele halo balansu ba númeru kandidatura ne’ebé okupadu ho mane,” nia hateten.

Timor-Leste daudaun hasoru problema oin-oin, liu-liu problema sosiál, tanba ne’e grupu juventude RAEOA garante katak, ho prezidente feto maka bele iha solusaun ne’ebé di’ak liu hodi bele lori fila-fali esperansa ba timor-oan hotu.

Grupu juventude RAEOA deklara katak molok halo konferénsia imprensa ne’e, sira halo ona aproximasaun ho Isabel da Costa Ferreira katak sira atu apoiu nia ba Prezidente Repúblika, tanba ne’e sira garante katak ho sira-nia apoiu Isabel da Costa Ferreira sei kandidata-an ba Prezidente Repúblika.

“Bainhira Isabel da Costa Ferreira halo nia viajen hosi Portugál mai Timor-Leste mak nia sei fó sai deklarasaun loloos katak nia kandidatu-aan ba Prezidente Repúblika ne’e loos ka lae, maibé daudaun ne’e ami fó apoiu nia liuhosi konferénsia imprensa  ami halo ona aproximasaun ho nia no nia simu ami-nia apoiu, tanba ne’e númeru ne’ebé ami atu apoiu ba nia mak 5,000 proponente ne’ebé husu juventude timor-oan hotu nia apoiu,” nia dehan.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here