Movimentu Apoiu 'Lú-Olo' Oé-Cusse deklara apoiu 'Lú-Olo' re-kandidata-an ba Prezidente Repúblika períodu 2022-2027. Imajen Tatoli/ Abílio Elo Nini

OÉ-CUSSE, 16 agostu 2021 (TATOLI)-Reprezentante Atoni-oan sira iha  Rejiaun Administrativa Espesiál Oé-Cusse Ambeno (RAEOA) ne’ebé halibur-malu  iha Movimentu Apoiu Lú-Olo Oé-Cusse (MALO) re-afirma sira-nia apoiu tomak ba atuál Prezidente Repúblika Francisco Guterres “Lú-Olo”, atu re-kandidata-an tan ba Prezidente Repúblika períodu 2022-2027.

Liuhosi konferénsia imprensa  iha Kafe Dominícana Oé-Cusse, segunda ne’e, portavós MALO, Antonio Marques Araújo, deklara katak sira  apoiu Lú-Olo re-kandidata-an tanba konsidera Lú-Olo nu’udar lidér rezisténsia akumulativu.

“Haree ba dinámika polítika no dezenvolvimentu iha Timor-Leste ne’ebé komesa la’o di’ak ona no hatudu progresu pozitivu hafoin enfrenta impase polítika 2017-2019, maka ami reprezenta povu Atoni Oé-Cusse Ambeno hakarak deklara, apoiu Dr. Francisco Guterres ‘Lú-Olo’, Prezidente Repúblika atuál, atu re-kandidata-an ba Prezidente Repúblika períodu 2022-2027,” Antonio Marques Araújo afirma.

Razaun fundamentál ne’ebé apoiu iha pontu haat mak importante maka hanesan;
1. Provas hatudu katak  Francisco Guterres ‘Lú-Olo’ konsege amostra ninia kapasidade intelektuál no lideransa, no iha koñesimentu ba lei, firme iha prinsípiu no desizaun hodi asegura ezisténsia Estadu de direitu demokrátika iha ita nia rai durante ninia mandatu.

  1. Francisco Guterres ‘Lú-Olo’ iha ona esperiensia nu’udár Prezidente Repúblika, ne’e duni bainhira re-kandidata-an ba períodu tuir mai ne’e, sei hala’o kna’ar ho di’ak liután hodi hametin pás no estabilidade no promove prosesu dezenvolvimentu iha Timor-Leste.
  2. Francisco Guterres ‘Lú-Olo’ lider rezisténsia ida, veteranu tinan 24, aman nasaun ne’ebé di’ak, kaer ukun ho ulun malirin, fiar-an no iha responsabilidade pesoál ne’ebé simples.
  3. Francisco Guterres ‘Lú-Olo’ iha figura lideransa akumulativu, respeita diferensa, tane-as valores demokrasia no sai Prezidente ba ema hotu.

Biban ne’e, juventude Movimentu Apoiu Lú-Olo Oé-Cusse, Cipriano Falo, afirma mós katak nu’udár foin-sa’e apresia ho Prezidente Francisco Guterres ‘Lu-Olo’ tanba durante nia mandatu tinan lima, konsege trava Governante barak ne’ebé komete krime korrupsaun.

Jornalista : Abílio Elo Nini
Editór       : Francisco Simões

HAKEREK NO HATÁN

Please enter your comment!
Please enter your name here