Dioseze Dili entrega dokumentu harii universidade katólika ba MESSK, iha salaun enkontru MESSK, Colmera, sesta (16/07). Imajen TATOLI/Egas Cristóvão

DILI, 16 jullu 2021 (TATOLI)–Arsebispu Arkidioseze Metropolitana Dili, Don Virgílio do Carmo da Silva, iha sesta ne’e, entrega dokumentu ba Ministériu Ensinu Superiór Siénsia no Kultura (MESSK) hodi analiza molok loke universidade katólika iha Dili.

Dokumentu ne’e entrega hosi Xefe Instaladora Universidade Katólika Timorense, Belarmino da Silva, ba Diretora Jerál MESSK, Maria Filomena Lay Guterres, iha edifísiu MESSK, Colmera.

Arsebispu Arkidioseze Metropolitana Dili, Don Virgílio do Carmo da Silva. Imajen TATOLI/Egas Cristóvão

“Ami entrega dokumentu hodi inklui regra hotu atu loke universidade katólika. Antes ne’e iha 19 marsu liubá, ami hatama karta pedidu ba abertura prosesu no hafoin prosesu ne’e, ekipa instaladora serbisu maka’as, nune’e iha loron 16 jullu entrega dokumentu hotu tuir padraun ne’ebé instituisaun husu hodi loke Universidade Katólika Timorense (UKT),” Bispu hateten iha edifísiu MESSK.

Inisiativa harii universidade katólika desde dékada rua liubá

Responsável Dioseze Dili ne’e haktuir, inisiativa harii universidade katólika desde tempu Don Carlos Filipe Ximenes Belo to’o Saudozu Don Alberto Ricardo da Silva nian.

“Universidade ne’e la’ós ha’u-nia mehi, maibé mosu kedan kuaze dékada rua ba kotuk, momentu ne’ebá Don Carlos Filipe hahú forma ekipa ida hodi halo estudu viabilidade, hafoin Don Alberto Ricardo koko atu tau infraestrutura ruma maibé la konsege, to’o mai ha’u laiha korajen atu hala’o ida-ne’e maibé liu tiha tinan lima haree katak tempu ona atu realiza,” nia haktuir.

Haree ba esforsu atu obriga prosesu sira la’o ba oin, tanba forsa ida-ne’e mai hosi baze rasik, ne’ebé komunidade barak partikularmente eskola iha Dili, iha ona eskola katólika barak entaun husu parte Dioseze atu harii universidade.

Don Virgilio kompromete, ekipa Dioseze Dili prontu atu kolabora ho MESSK ligadu ho dokumentu sira.

“Ami hakarak buat ida de’it, karik buat hotu la’o di’ak iha tinan ne’e, ami hakarak halo abertura maibé la obriga, tanba prosesu ne’e la’o kleur ona. Kontiúdu dokumentu ami hatán ba padraun lisensiamentu la’ós inventa maibé dokumentu ne’ebé iha relasaun ho regra sira, universidade  estabelese iha Balide, Dili,” Bispu subliña.

Hahú ho fakuldade haat

Tuir rekezitu, bainhira loke universidade tenke hahú ho fakuldade haat, tanba ne’e maka sei loke uluk fakuldade sosiál rua no fakuldade exata rua.

Fakuldade sosiál kompostu hosi edukasaun, lian no arte, enkuantu fakuldade exata kompostu hosi siénsia no umana, ne’ebé kuandu realiza ona sei loke tan fakuldade siénsia médika no agríkola.

Kona-ba edifísiu, daudaun ne’e preparasaun atinje ona 80%, ne’ebé hanesan edifísiu antigu ida maka halo reabilitasaun no Dioseze Dili mak sai na’in ba propriedade sira.

Ema 50 ho grau doutoramentu no mestradu prontu serví 

Tuir Don Virgílio, iha ona rekursu umanu ne’ebé atu atu konstribui iha universidade katólika ne’e.

“Sei iha reitór hodi tau-matan, nu’udar Arsebispu sei nafatin tau-matan, tanba ne’e priopridade Arsebispu nian. Iha ona rekursu umanu tanba ekipa instaladora prepara programa tanba ne’e iha ona ema na’in-50 kompromete serví no sira ne’e hotu grau doutoramentu no mestradu,” Don Virgilio dehan.

Rekursu umanu sira maioria timor-oan, maibé sei envolve mós ema estranjeiru.

Iha fatin hanesan, Diretora Jerál MESSK, Maria Filomena Lay Guterres, espera dokumentu sira ne’e kompletu.

“Hein katak dokumentu sira kompleta ona ho rekizitu sira hosi padraun lisensiamentu no karik iha buat ruma kolabora hodi kompleta, atu nune’e prosesu bele termina tuir tempu fulan-tolu ka bele altera ba fulan-neen,” Diretora Jerál MESSK dehan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here