Pesoál saúde fó vasina ba abitante, iha sentru saúde iha Dili. Imajen TATOLI/António Gonçalves.

DILI, 21 agostu 2021 (TATOLI)—Ministériu Saúde liuhosi Sala Situasaun, Sentru Integradu Jestaun Krize (CIGC, sigla Portugés), sábadu ne’e rejista kazu óbitu haat, pozitivu 281, rekoperadu 71 no kazu ativu 3.088.

Notísia Relevante: COVID-19: óbitu ida, pozitivu 267 no ativu 2.882

“Kazu detetatu foun 281 mai hosi Dili 212, Covalima 19, Manatuto 16, Baucau 15, Manufahi 13 no munisipiu seluk hamutuk neen (6) kompostu hosi mane 176 no feto 105. Hosi totál kazu detetadu foun, hirak ho idade tinan 20 to’o 66 (23,4%) ho idade entre tinan 12-59 nain 201 (71,5 %); ho idade 60 mai karaik na’in 14. Hosi totál kazu detetadu foun, kazu 86 ka 30,6% mak sintomátiku (hatudu sintomas),” Koodenadór Forsa-Tarefa ba prevensaun no Mitigasaun, Rui Maria de Araújo, hateten liuhosi nota ne’ebé Agéncia TATOLI asesu, sábadu ne’e.

Nia informa, total óbitu ne’ebé relata ohin, dahuluk, timor-oan feto, idade tinan 73, hela iha Dili, no iha 20 agostu 2021, diagnóstikadu ho sindroma insufisiénsia respiratória aguda (SIRA) tanba COVID-19 (PCR pozitivu ho CT 36,5).

Matebian ne’e sofre mós hipertensaun. Iha fatin izolamentu Lahane, hala’o tratamentu tuir protokolu ne’ebé iha maibé matebian i’is-kotu horikalan 22:00 tanba falénsia orgaun lubuk-ida (multiple organ failure). Rezultadu PCR hafoin i’is-kotu hatudu CT 34,9.

Daruak, matebian nu’udar timor-oan mane no idade tinan 74, hela iha Dili, iha 20 agostu 2021, diagnóstikadu ho sindroma insufisiénsia respiratória aguda (SIRA) tanba COVID-19 (PCR pozitivu ho CT 24,3).

Matebian sofre mós hipertensaun. Iha fatin isolamentu Vera Cruz, hala’o tratamentu tuir protokolu ne’ebé iha, maibé matebian i’is-kotu horikalan 22:45 tanbá falénsia orgaun lubuk-ida (multiple organ failure). Resultadu PCR hafoin i’is-kutu hatudu CT 14,9.

Datoluk, timor-oan feto, idade tinan 36, hela iha Dili, iha 11 agostu 2021, diagnóstikadu iha HNGV ho sindroma insufisiénsia respiratória aguda (SIRA) tanbá COVID-19 (PCR pozitivu ho CT 28,0). Matebian sofre mós diabete.

Matebian ne’e Iha fatin isolamentu Vera Cruz, hala’o tratamentu tuir protokolu ne’ebé iha, maibé matebian i’is-kotu ohin dader 03:00 tanbá falénsia orgaun lubuk-ida (multiple organ failure) resultadu PCR hafoin i’is-kutu hatudu CT 11,7.

Dahaat, timor-oan mane, idade tinan 46, hela iha Dili, iha 21 agostu 2021, diagnóstikadu iha Emerjénsia HNGV ho pneumonia tanbá COVID-19 (PCR pozitivu ho CT 19,8). Enkuantu sei hala’o tratamentu inisiál iha Emerjénsia

HNGV tuir protokolu ne’ebé iha, matebian i’is-kotu, maizumenus 11h45 dadeer, tanba emobolia pulmonar. Rezultadu PCR hafoin i’is-kotu hatudu CT 16,8.

“Família matebian kordena hela ho ekipa saúde atu hala’o funeral tuir protokolu ne’ebé adopta iha Timor-Leste,” Rui Maria de Araújo hateten.

Total kazu konfirmadu kumulativu sura hosi 21 marsu 2020 to’o 21 agostu 2021 hamutuk 13.981. Hosi horisehik mai ohin, Laboratóriu Nasionál Saúde halo teste PCR iha Dili hamutuk 512 ho detallu hanesan tuir mai, Vijilánsia sentinela 9, Rastreiu ba kontaktu 241, Rastreiu Aleatóriu 20, Viajen sai husi serka sanitária Munisipiu Dili 128, viajen internasionál laiha no Follow up iha Kuarentena na’in 114.

Totál teste PCR ne’ebé halo horisehik, 20  agostu, iha Munisipiu sira seluk, REAOA no HNGV hamutuk 231 ho detallu hanesan tuir mai Baucau 35, Ermera laiha, Maliana 12,  Maubisse 36, RAEOA 28,  Suai 40,  Viqueque 6, Lospalos haat no HNGV na’in 70.

Vasina ne’ebé fó ona ba populasaun elijível tinan 18 ba leten, to’o ohin dader 10:00, 21 agostu tuir sistema informasaun Sáude iha Ministériu Saúde ho totál kumulativu doze dahuluk iha Dili 72,2% no totál komulativu doze daruak iha Dili 53,3%.

“Sidadaun ne’ebé simu ona vasina doze dahuluk iha Timor-Leste 48,6% no simu ona doze daruak 21,4%,” nia dehan.

Atu bele hatene surtu ida ninia evolusaun no mós surtu ne’e aumenta ka diminui, indikadór ida ne’ebé matenek-nain epidemiolojia sira uza mak insidénsia.

Konvensionalmente insidénsia sukat totál kazu foun, kada loron, pur 100 mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron 7 ikus mak 16,8/100 mil abitante, enkuantu ba de’it Munisipiu Dili 43,3/100 mil abitante.

Ohin, insidénsia Munisípiu Manufahi 20,0/100 mil abitante, tuir kedas ho RAEOA ho insidénsia 13,3/100 mil abitante, Munisípiu Covalima ho insidénsia 12,6/100 mil abitante, Munisípiu Baucau ho insidénsia 8,7/100 mil abitante, Munisípiu Manatuto ho insidénsia 7,5/100 mil abitante, hafoin Munisípiu Ainaro ho insidénsai 6,5/100 mil abitante.

Dadus iha leten hatudu katak, Insidénsia Munisípiu Dili, Munisípiu Manufahi ho RAEOA tutuir malu a’as-liu iha Timor-Leste laran tomak, munisípiu haat seluk hanesan Covalima, Baucau, Manatuto, Ainaro mós hatudu risku a’as-liu, atu populasaun hetan da’et no hada’et tutan virus SARS-CoV-2, iha komunidade nia le’et.

Iha 21 agostu 2021, izolamentu Vera Cruz ho Lahane halo tratamentu ba kazu detetadu na’in-61, iha área obstetrisia na’in-ualu (8), medisina interna na’in-41, sirurjia na’in-sia (9) no pediatria tolu (3). Sira na’in-ualu (8) iha obstetrisia, kategoria leve hotu.  Na’in 41 iha medisina interna, 13 kategoria grave (tolu uza ventilador, 10 ho oksijéniu), 13 kategoria moderadu, 15 kategoria leve. Sira na’in-sia (9) iha sirurjia, kategoria leve hotu no sira na’in-tolu (3) iha pediatria ho kategoria leve.

CIGC informa ba públiku katak iha agostu 2021 nian laran, iha timor-oan hamutuk 649 ne’ebé deportadu hosi Indonézia, tanbá tama ilegalmente ba Indonézia.

Ohin, iha timor-oan 164 mak deportadu no hosi 649 ne’ebé deportadu durante agostu 2021, 113 hala’o kuarentena iha Tasitolu hahú 10 agostu, no iha 63 mak teste pozitivu 20 agostu 2021.

Nune’e, hatudu taxa pozitividade 55,7%. Taxa ida-ne’e a’as tebes, kompara ho taxa pozitividade nasionál Timor-Leste nian, por volta 38%, iha loron ohin. Taxa pozitividade ne’ebé a’as, hatudu mós sinál indiretu hosi prezensa variante Delta.

Variante Delta COVID-19 iha Dili-Ermera

CIGC mós informa ba públiku katak, amostra laboratóriu ba ezame PCR hamutuk 45, ne’ebé rekolla entre 31 jullu ho 09 agostu 2021, no Laboratóriu Nasional Saúde (LNS) haruka ba halo sekuensiasaun genómika, iha loron 11 agostu, iha Peter’s Doherti Institute iha Melbourne, Australia, ho rezultadu ne’ebé LNS simu iha 20 agostu 2021, hatudu amostra 22 hosi Dili no amostra 15 hosi Gleno, Ermera mak iha lineajen B.1.617.2 (Delta), variante ne’ebé preokupante, ka ‘variant of concern’.

Rezultadu hirak ne’e hatudu katak 82,2% (37/45) hosi amostra konfirma prezensa variante Delta.

Rezultadu hatudu katak variante Delta transmite ona iha komunidade nia le’et iha Ermera, hafoin munisipiu Dili, no possibilidade boot, iha mós munisipiu hirak ne’ebé númeru kazu aumenta maka’as hahú  agostu 2021.

CIGC apela ba populasaun iha Timor-Leste laran tomak, maske karik simu ona vasina, favór respeita nafatin regra prevensaun no ijiéne individual, ne’ebé Governu hatu’ur ona, atu prevene moras COVID-19 da’et ba mai.

Regra sira ne’e, hanesan ita hotu hatene ona, mak uza máskara,  fase liman beibeik ho sabaun ka dezinfetante ruma,  evita kose liman ba matan, inus ho ibun,  bainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak; hamri’ik ka tur do’ok husi ema seluk, mínimu metru ida ho balun.

Jornalista : Florecio Miranda Ximenes

Editór       : Cancio Ximenes

HAKEREK NO HATÁN

Please enter your comment!
Please enter your name here