Médiku-sira hala’o atendimentu ba Komunidade ne’ebé simu vasina AstraZeneca iha sentru saúde Comoro, segunda (09/08/21). Imajen Tatoli/António Gonçalves.

DILI, 20 agostu 2021 (TATOLI)— Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 267, rekoperadu 113 no kazu ativu 2.882.

Totál óbitu ne’ebé relata ohin, timoroan  feto ida ho idade 50, hela iha Dili, no iha 07 agostu 2021, diagnótikadu iha HNGV ho COVID-19 (PCR pozitivu ho CT E gene 16,7, N gene 19,1).

Notisia relevante:COVID-19: óbitu ida, pozitivu 278 no ativu 2.729

Matebian sofre mós kankru mama direita, ho metástase ba pulmaun, no iha mós anemia severa. Iha fatin izolamentu Vera Cruz, hala’o tratamentu tuir protokolu ne’ebé iha, maibé matebian iis-kotu horiseik loraik 16:40 tanba xoke séptiku no falénsia orgaun lubuk-ida (multiple organ failure).

“Rezultadu PCR hafoin iis-kotu hatudu CT E gene 33. Familia koordena hela ho ekipa saúde atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, sesta ne’e.

Kazu foun ohin 267 mai hosi Dili 152, Baucau 35, Ainaro 30, Covalima 13, Manufahi 12 no munisípiu seluk 35 kompostu hosi mane 146 no feto 121.

Hosi totál kazu detetadu foun ohin, ho idade 20-60 (22,4) ho idade entre tinan 12-59 na’in 195 (73%), idade 60 mai karaik na’in 12. Hosi kazu detetadu foun ohin 89 kazu ka 33,3% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 20 agostu 2021 hamutuk 13.700. Hosi horisehik mai ohin, teste ne’ebé Laboratóriu Nasionál Saúde halo hamutuk 960 PCR, ho detallu hanesan tuir-mai, Vijilánsia sentinela na’in 101, rastreiu ba kontaktu ka Contact tracing 408, Rastreiu Aleatóriu  ka Random Screening nain 86, viájen sai-hosi serka sanitária hosi Dili 335, Viájen internasionál laiha, Follow up iha kuarentena na’in 30.

Totál testes PCR ne’ebé halo horisehik 19 agostu iha munisípiu-sira seluk, RAEOA no HNGV hamutuk 362, ho detalla hanesan tuir-mai, Maubisse 63, Maliana 63, Viqueque 13, Suai 90, Baucau 66, Ermera ida, RAEOA 24, HNGV 34 no Lautém ualu.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00,  loron 20 agostu tuir sistema informasaun Saúde iha Ministériu Saúde  ho totál  kumulativu 1ª doze iha Dili (72,1%) no  totál  kumulativu 2ª doze  iha Dili (52,9%).

Ema ne’ebé simu ona vasina doze dahuluk iha Timor-Leste  (47,6%) no simu ona doze daruak (21,0%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 15,5/100 mil abitante, enkuantu ba de’it munisípiu Dili,38,8/100 mil abitante.

Ohin, insidénsia munisípiu Manufahi 16,8/100 mil abitante, tuir kedan ho RAEOA ho insidénsia 14,5/100 mil abitante, munisípiu Covalima ho insidénsia 10,1/100 mil abitante, munisípiu Baucau ho insidénsia 7,3/100 mil abitante, munisípiu Liquiça ho insidénsia 7,0/100 mil abitante, munisípiu Ainaro ho insidénsia 6,8/100 mil abitante, hafoin munisípiu Ermera ho insidénsia 6,0/100 mil abitante.

Dadus iha leten hatudu katak, insidénsia munisípiu Dili, munisípiu Manufahi ho RAEOA tu-tuir malu a’as-liu iha Timor-Leste laran tomak, munisípiu  lima seluk – Covalima, Baucau, Liquiça, Ainaro ho Ermera – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 20 agostu 2021, izolamentu Vera Cruz halo tratamentu ba kazu detetadu na’in 57, Iha área obstetrisia na’in-sia,no iha medisina interna na’in 37,  iha sirurjia na’in-ualu, pediatria na’in-tolu. Iha obstetrisia  na’in-sia kategoria kaman hotu. Iha área medisina interna  na’in 37. Na’in 15 kategoria grave (ida uza ventiladór)  na’in 14 uza oksijéniu, na’in 13 kategoria  moderadu, sia  kategoria kaman. Sira na’in-ualu  iha sirurjia kategoria kaman hotu, na’in-tolu pediatria kategoria kamán.

Númeru kazu moderadu no grave ne’ebé baixa iha Vera Cruz, hatudu  katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Variante delta iha Dili no Ermera

SIJK Informa mós ba públiku katak, amostra laboratóriu ba ezame PCR hamutuk 45, ne’ebé rekolle entre 31 Jullu ho 09 agostu 2021, no Laboratóriu Nasionál Saúde haruka ba halo sekuensiasaun genómika, iha loron 11  Agostu, iha Peter’s Doherti Institute iha Melbourne, Austrália, hatudu katak, 22 amostra hosi Dili no 15 amostra hosi Gleno Ermera mak iha lineajen B.1.617.2 (Delta), variante ne’ebé preokupante, ka variant of concern.

Rezultadu hirak ne’e hatudu katak 82,2% (37/45) hosi amostra konfirma prezensa variante Delta.

Rezultadu ne’e mós konfirma katak variante Delta transmite ona iha komunidade nia le’et iha Ermera, hafoin munisipiu Dili, no possibilidade bo’ot, iha mós munisipiu hirak ne’ebé númeru kazu aumenta maka’as hahú fulan agostu 2021.

Apela ba populasaun iha Timor-Leste laran tomak, maski simu ona vasina, favor respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta malu, la presiza ka’er liman, bensa-liman, rei-malu ka haku’ak malu,  evita halibur malu barak, hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here