Ofisiál F-FDTL bainhira partsipa iha aniversariu FALINTIL ba dala-46 iha Kuartél Jerál F-FDTL, Fatuhada, Dili, sesta (20/8/2021). Imajen Tatoli/Antonio Gonçalves.

DILI, 20 agostu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, apela ba povu tomak atu hateke ba oin tanba komemorasaun loron 20 agostu 2021 nu’udar loron istóriku ba Forsa Libertasaun Nasionál Timor-Leste (FALINTIL) ba dala-46 ne’e hela ho memória moruk ne’ebé liu ona.

Notísia Relevante: MAKLN-KKLN presiza integra sobrevivente sira iha programa dezenvolvimentu nasionál

Prezidente Parlamentu Nasional, Aniceto Longuinhos Guterres Lopes, Imajen Tatoli/Antonio Gonçalves.

“Liu ona tinan 46, mai ita hateke ba oin. Ita-nia Prezidente Repúblika hakarak haforsa rekomendasaun CAVR ‘Chega!’ ho apelu espesiál ida ba loron ohin, atu ita  hotu-hotu hametin liután vontade koletiva ida  katak, ita sei la husik akontesimentu moruk sira ne’e mosu fila-fali,  hanesan uluk akontese iha ita-nia rai doben Timor-Leste,” Aniceto Guterres hato’o diskursu iha ámbitu aniversáriu FALINTIL ba dala-46 iha Kuartél Jenerál, Fatuhada, Dili, sesta ne’e.

Deputadu Aniceto Longuinhos Guterres Lopes haktuir, hahú hosi loron 11 agostu to’o meadu setembru 1975 no akontesimentu sira mosu tuir mai, husik hela memória moruk lubuk ida entre timor-oan sira.

Hosi memória moruk ne’ebé rejista ona iha relatóriu Komisaun Nasionál Akollimentu, Verdade no Rekonsiliasaun (CAVR-sigla portugés) ”Chega!” ho  rekomendasaun lubuk ida (204) kona-bá períodu ne’e.

Nia fó-sai katak, líder sira hosi UDT no FRETILIN, hodi partidu naran, ho barani no laran luan, rekuñese ona sala sira-ne’ebé halo hori-uluk no husu ona deskulpa ba vítima sira iha Timor-Leste.

Nu’udár Prezidente Parlamentu Nasionál no iha tempu ne’ebá lidera CAVR, apoia tebes vontade koletiva ne’ebé Prezidente Repúblika apela ba timor-oan hotu no ba jerasaun foinsa’e sira atu haktuir.

Nia haktuir, bainhira invazaun indonézia akontese iha 7 dezembru 1975, FALINTIL hametin-an liután, nu’udár forsa defeza nasionál no oferese rezisténsia tuir nia kapasidade durante tinan 24 no FALINTIL uza estratéjia oinoin hodi kontinua funu ho lema “Mate ka Moris Ukun Rasik An”.

Ho ezisténsia ne’e, povu identifika-an ho FALINTIL tanba FALINTIL hamrik ho Povu nia oan sira liuhosi inspira no apoia malu, hodi halo rezisténsia metin ba beibeik, tinan ba tinan, ho partisipasaun Timor-oan sira iha diáspora, no apoia husi komunidade internasionál, lori Timor-Leste to’o hetan Ukun rasik an.

Aniceto Guterres ne’ebé prezide aniversáriu FALINTIL ba dala-46 sente ho ksolok boot no onra ida, hodi hamutuk ho kombatente no veteranu libertasaun nasionál sira selebra loron istóriku ida-ne’e.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here