Prezidente Parlamentu Nasional, Aniceto Longuinhos Guterres Lopes halo inspesaun ba formatura F-FDTL bainhira sai inspetór iha aniversáriu FALINTIL ba dala-46 iha Kuartél Jerál, Fatuhada, Dili, sesta (20/8/2021). Imajen Tatoli/Antonio Gonçalves.

DILI, 20 agostu 2021 (TATOLI)—Ministériu ba Asuntu Kombatente Libertasaun Nasionál (MAKLN) no Konsellu Kombatente Libertasaun Nasionál (KKLN) presiza integra sobrevivente sira iha programa dezenvolvimentu nasionál.

Notísia Relevante: Labele haluha estafeta sira-nia kontribuisaun ba FALINTIL

Prezidente Parlamentu Nasional, Aniceto Longuinhos Guterres Lopes, Imajen Tatoli/Antonio Gonçalves.

“Hamutuk ho ita-nia Prezidente Repúblika no Primeiru-Ministru, Jenerál Taur Matan Ruak, husu ba Ministériu Asuntu Kombatente Libertasaun Nasionál atu haree hamutuk ho Konsellu Kombatente Libertasaun Nasionál oinsá integra sobrevivente sira iha programa dezenvolvimentu Timor-Leste nian,” Prezidente Parlamentu Nasionál, Deputadu Aniceto Longuinhos Guterres Lopes, fó hanoin asuntu ne’e bainhira prezide aniversáriu FALINTIL ba dala-46, iha Kuartél Jenerál, Fatuhada, Dili, sesta ne’e.

Estadu Timor-Leste halo esforsu barak ona hodi rekoñese no valoriza sakrifisiu hosi eroi no mártir pátria sira hodi dignifika liután vida kombatente sobrevivente sira-ne’ebé validadu ona, liuhosi pagamentu pensaun no subsidiu.

Nune’e mós harii uma, tratamentu saúde, atribuisaun bolsa estudu ba oan sira, no benefísiu sira seluk no oras ne’e daudaun Konsellu Kombatente Libertasaun Nasionál hala’o hela verifikasaun dadus ba kombatente sira-ne’ebé rejistadu iha tinan 2009.

“Ita hotu hein katak iha tempu badak sei ramata servisu boot ida-ne’e tanba sobrevivente sira nu’udar ajente ativu sira iha prosesu dezenvolvimentu sósiu-sivíku, eduka ita-nia ema sai sidadaun sivíku no sai sidadaun ekonómiku no responsável ba Povu no Estadu ho espíritu FALINTIL nian,” nia dehan.

Prezidente Parlamentu Nasionál ne’e hateten, helik-fatin gerilleiru sira-nian no fatin istóriku sira seluk, bele sai fonte aprendizájen no inspirasaun boot ba jerasaun foinsa’e sira atu hakle’an sentimentu orgullu pertense ba Povu barani na’in sira.

Atu hatene lala’ok luta ba libertasaun nian liuhosi Centro Nacional Chega (CNC) ne’ebé halo ona serbisu exelente atu prezerva fatin istóriku sira hodi eduka labarik no joven sira.

Nia husu ministériu relevante sira no parseiru sira atu tulun KKLN no CNC hodi dezenvolve fatin sira-ne’e no inklui iha roteiru turizmu istóriku sira, nune’e dada turista sira hosi rai sira seluk hodi hatama reseita ba Estadu.

Prezidente Parlamentu konvida sidadaun hotu-hotu atu fó onra ba eroi no mártir FALINTIL sira, liuhosi halo-tuir no kaer-metin valór no ezemplu ne’ebé sira husik hela no fó liman ba malu, respeita no hadomi malu.

Nune’e mós tenke serbisu maka’as ba hadi’ak povu tomak nia moris di’ak, no hametin soberania Estadu Direitu Demokrátiku.

Nia apela ba Ass’wain sobrevivente sira atu hatudu ezemplu di’ak nafatin ba alin sira, oan sira, bei-oan sira ho domin, respeita malu, solidariedade no fraternidade, nune’e hamutuk halo Timor-Leste nakfilak ba fatin moris ho dame, estabilidade no kontribui ba dezenvolvimentu sustentável.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here