Prezidente Parlamentu Nasional, Aniceto Longuinhos Guterres Lopes halo inspesaun ba formatura F-FDTL bainhira sai inspetór iha aniversáriu FALINTIL ba dala-46 iha Kuartél Jerál, Fatuhada, Dili, sesta (20/8/2021). Imajen Tatoli/Antonio Gonçalves.

DILI, 20 agostu 2021 (TATOLI)—Forsa Armada Libertasaun Nasionál (FALINTIL) nia luta durante tinan 24 nia laran ne’e hetan susesu, la sees hosi kontribuisaun hosi estafeta sira iha prosesu funu tanba estafeta sira sempre hasoru risku iha kualkér momentu.

Notísia Relevante: FALINTIL mosu iha senáriu espesiál

Bainhira preside aniversáriu FALINTIL ba dala-46, Prezidente Parlamentu Nasionál, Deputadu Aniceto Longuinhos Guterres Lopes, hateten ho prinsípiu Povu nian atu liberta-an hosi kolonizasaun no okupasaun estranjeira, mak FALINTIL kaer metin luta armada ba libertasaun nasionál ho kbiit rasik, nakonu ho barani, dixiplina, espíritu sakrifísiu, domin no dedikasaun tomak.

“Bainhira ita ko’alia kona-ba FALINTIL ninia susesu, ita labele haluha sira-ne’ebé kontribui ba Frente Armada, nu’udar estafeta liuhosi kna’ar klandestinu sira seluk. Tanba, sira mós dedika-an ho sakrífisiu oioin no tau sira-nia an iha risku boot,” Xefe Lejizladór ne’e hateten.

Nia hatutan, iha aniversáriu ba loron ohin, tenke temi mós buibere sira-nia apoia ba FALINTIL, la’ós buibere barak mak kaer kilat ajuda FALINTIL maibé sira-nia apoia inkondisionál kontinua funu.

“Barak tebes mak arriska sira-nia vida no família nian iha vila okupada sira, tanba uza sira-nia hela-fatin rasik nu’udar sentru apoiu lojístiku ba FALINTIL sira iha ai-laran,” nia dehan.

Nia haktuir, kompatriota feto barak sai ponte ligasaun entre Frente Armada, Frente Klandestina no Frente Esterna.

“Prezidente Repúblika husu ita hotu atu rekuñese no koñese liután obra koletiva ida-ne’e, ne’ ebé hanaran ‘Buibere Hamriik Ukun Rasik An’,” nia hateten.

Nia hatutan, livru hanaran “Buibere Hamriik Ukun Rasik An” nu’udar papél importante feto sira nian iha luta armada no iha kontestu tomak iha luta libertasaun nasional.

“Nu’udar responsável ida iha Frente Klandestina, iha Rezisténsia Estudantil no nu’udar advogadu ba Direitu Umanu iha tempu okupasaun Indonézia, komprende tebes mensájen ida-ne’e no afirma ha’u-nia apoiu ba obra sira hanesan ne’e,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here