Ofisiál F-FDTL bainhira partsipa iha aniversariu FALINTIL ba dala-46 iha Kuartél Jerál F-FDTL Fatuhada, Dili, sesta (20/8/2021). Imajen Tatoli/Antonio Gonçalves.

DILI, 20 agostu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten Forsa Armada Libertasaun Nasionál Timor-Leste (FALINTIL) mosu iha senáriu espesiál tanba hetan orientasaun hosi Komité Sentrál FRETILIN (CCF-sigla portugés).

Notísia Relevante: Komandu F-FDTL halo promosaun diviza ba membru na’in 19

“FALINTIL mosu iha senáriu polítiku espesiál ida, tanba harii ho orientasaun hosi Komité Sentrál FRETILIN (CCF, sigla portugés), hafoin deklarasaun insureisaun Jerál Armada iha Aisirimou, Aileu, iha 15 agostu 1975. Militár timor-oan sira-ne’ebé halo parte ezérsitu portugés, iha Kuartél-Jerál Taibessi organiza-an nu’udár brasu armadu FRETILIN, ho objetivu atu restaura pás no estabilidade iha ita-nia rain,” Aniceto Guterres hato’o diskursu iha ámbitu aniversáriu FALINTIL ba dala-46 iha Kuartél Jenerál, Fatuhada, Dili, sesta ne’e.

Hafoin Governadór Portugés deside sai hosi Timor-Leste no lori-sai mós sira-nia tropa tomak, FALINTIL mak defende integridade territóriu no kaer metin soberánia nasionál.

“Biar ho forsa ki’ik liu, konsege reziste inkursaun militár iha fronteira terrestre. Bainhira FRETILIN halo proklamasaun unilaterál independénsia iha 28 Novembru 1975, FALINTIL nakfilak kedas ba forsa armada Timor-Leste nian, katak timor-oan hotu-hotu nia forsa defeza,” nia deham.

Nia haktuir, bainhira invazaun Indonézia akontese iha 07 dezembru 1975, FALINTIL hametin-an liután nu’udár forsa defeza nasionál no oferese rezisténsia tuir nia kapasidade durante tinan 24 no FALINTIL uza estratéjia oioin hodi kontinua funu ho lema “Mate ka Moris Ukun Rasik An”.

Ho ezisténsia ne’e, povu identifika-an ho FALINTIL tanba FALINTIL hamrik ho Povu nia oan sira liuhosi inspira no apoia malu, hodi halo rezisténsia metin ba beibeik, tinan ba tinan, ho partisipasaun timor-oan sira iha diáspora no apoia hosi komunidade internasionál, lori Timor-Leste to’o hetan Ukun rasik an.

Aniceto Guterres ne’ebé prezide aniversáriu FALINTIL ba dala-46 sente ho ksolok boot no onra ida, hodi hamutuk ho kombatente no veteranu libertasaun nasionál sira selebra loron istóriku ida-ne’e.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here