Estudante hosi Eskola Ensinu Sekundáriu Jerál (ESJ) 4 setembru Viqueque, selebra aniversáriu Forsa Armada Libertasaun Nasionál Timor Leste (FALINTIL), ba dala-46 ho isar Bandeira nasionál, sesta (20/08/21). Imajen Tatoli/Vitorino Lopes da Costa.

VIQUEQUE, 20 agostu 2021 (TATOLI)—Eskola Ensinu Sekundáriu Jerál (ESJ) 4 setembru Viqueque, selebra aniversáriu Forsa Armada Libertasaun Nasionál Timor Leste (FALINTIL), ba dala-46 ho isar Bandeira nasionál, atu fó-hanoin ba estudante-sira labele haluha istória luta libertasaun iha pasadu.

“Ami selebra loron ne’e ho inisiativa rasik, atu valóriza, fó onra no glória ba ita-nia erói-sira. Munisípiu Viqueque prontu realiza serimónia importante sira ne’e iha futuru. Ho serimónia sira ne’e makai ta fó hanoin ba jerasaun foun sira atu hatene kona-bá istória luta ba ukun rasik-an,” Diretór eskola, Verísimo Marques da Silva, hateten ba jornalista Agência Tatoli, hafoin isar bandeira, sesta ne’e.

Notísia relevante:Komandu F-FDTL halo promosaun diviza ba membru na’in 19

Iha fatin hanesan reprezentante administradór munisípiu Viqueque, José da Costa de Sousa, agradese ba profesór no estudante-sira ne’ebé ho inisiativa rasik hodi selebra loron FALINTIL nu’udár loron  importante, tanba liberta povu la’ós fásil maibé ho prosesu ne’ebé naruk.

“Istória mak ida-ne’e, estudante-sira ne’ebé agora daudaun tur iha banku eskola, tenke aprende no  estuda, tanba imi mak aban bain-rua sei sai hanesan kontinuadór ba prosesu dezenvolvimentu,”nia husu.

Iha oportunidade ne’e, Komandante Polísia Nasionál Timor-Leste (PNTL) munisípiu Viqueque, Superintendente, Sebastião Alves Quintão, espresso sentimentu kontente tanba bele hola parte iha serimónia ida-ne’e.

“Serimónia ne’e, importante tebes. Apresia ba diretór eskola bele konvida lider-sira hodi partisipa hodi fó hanoin ba jerasaun foun sira bele hatene kle’an kona-bá istória,” Superintendente, Sebastião Alves Quintão, apresia.

Reprezentante Veteranu Viqueque, Daniel Sarmento, mós agradese ba parte eskola 4 setembru ne’ebé ho inisitiva komemora loron importante ne’e no fó-hanoin ba autoridade-sira atu iha futuru, trasa ona planu di’ak, nune’e bele komemora mós iha nível munisipál, postu administrativu, suku no aldeia.

Hafoin serimónia isar Bandeira nasionál, kontinua kedan ba kari ai-funan iha Cruz boot Beloi, ne’ebé   partisipa hosi veteranu, profesór-sira, autoridade munisipál no estudante 4 setembru.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here