Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 19 agostu 2021 (TATOLI)–Ministru Petróleu no Minerál, Víctor da Conceição Soares, informa, ministériu hatama ona proposta adisionál millaun $113 hodi foku ba investimentu petróleu no minerál.

“Ami simu envelope fiskál tinan 2022 millaun $24, kompara ho tinan ne’e hetan millaun $85, ne’ebé la sufisiente funsiona tuir planu no investimentu foun, hanesan esplorasaun no inovasaun iha setór petróleu no minerál, entaun ami halo ona proposta adisionál no submete ona pur volta millaun $113,” Ministru Víctor hateten iha Ótél Timor, kinta ne’e.

Tuir governante ne’e,  proposta orsamentu adisionál atu finansia planu invenstimentu sira iha setór petrolíferu, liuliu bloku 18 ne’ebé lansa ona no  investimentu iha mineiru.

“Ita atu harii empreza mineiru ida tanba kódigu mineiru iha ona no komesa entra vigór iha tinan oin, ne’ebé fasilita ita atu hahú explora mineiru sira iha rai-leten no okos atubele fó reseita,” nia akresenta.

Tuir Ministru, hahú tinan 2014 to’o agora reseita fundu petrolífera hahú menus tanba produsaun kampu Bayu-undan hahú tuun ona, nune’e VIII Governu Konstitusionál hakarak atu hasa’e gráfika reseita petrolífera.

Iha tinan ne’e, Empreza Santos halo perfurasaun mina-matan tolu iha kampu Bayu-undan, ne’ebé posu dahuluk hetan ona petróleu no gás no daudaun halo hela produsaun.

Notísia relevante: Perfurasaun mina-matan dahuluk kampu Bayu-undan la’o ho susesu

“Iha tinan ida-ne’e, iha indikasaun gráfika produsaun Bayu-undan bele sa’e tanba Santos hahú atividade perfurasaun iha kampu ne’e, ne’ebé posu ida susesu ona no automátikamente konesaun halo foun fali, ne’ebé dadaun halo produsaun hela no posu daruak halo hela perfurasaun ne’ebé  tempu besik iha rezultadu, hafoin ba fura fali posu datoluk,” nia haktuir.

Nune’e, Ministru dehan, bainhira perfurasaun postu tolu maka hetan rezultadu di’ak hotu, maka bele iha kreximentu iha reseita petrolífera.

Jornalista :  Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here