Perfurasaun mina-matan dahuluk kampu Bayu-undan la’o ho susesu

DILI, 27 jullu 2021 (TATOLI)-–Autoridade Nasionál Petróleu no Minerál (ANPM) no empreza Santos hahú halo teste ba rezultadu gás ne’ebé hetan hosi perfurasaun mina-matan ka posu dahuluk iha kampu Bayu-undan.

Prezidente Konsellu Diretivu ANPM, Florentino Soares Ferreira, hateten, perfurasaun mina-matan dahuluk iha kampu Bayu-undan hosi operadór Santos la’o ho susesu.

“Tuir planu ita atu fura posu tolu, maibé faze dahuluk termina ona ho susesu tebes. Ita mós halo ona teste rezultadu ne’ebé hatudu 84 standard cubic feet per day (MMSCFD), ne’ebé ho rezultadu di’ak tebes no hetan gás iha primary target (upper M3B ninian zona), ” Prezidente ANMP informa ba Agência TATOLI , iha ninia knaar fatin, Ministériu Finansa, Aitarak-laran, tersa ne’e.

Empreza petrolífera ne’e halo perfurasaun ba dahuluk, bainhira kampu Bayu-undan hanesan ona parte esklusiva ida iha jurizdisaun Timor-Leste, hafoin ratifikasaun Tratadu Fronteira Marítima entre Timor-Leste no Austrália.

“Ita finaliza ona posu dahuluk no halo ona teste ba gás, ne’ebé konfirma katak ita hetan ona gás iha posu dahuluk. Tanba ne’e, ita hein de’it atu finaliza servisu tékniku balun hodi tama ba faze produsaun posu dahuluk. Nune’e, serbisu perfurasaun ba posu daruak kontinua la’o,” nia akresenta.

Programa ne’e, hetan ona desizaun finál ba investimentu iha janeiru tinan ne’e, kompostu hosi mina-matan tolu ba produsaun no sei dezenvolve adisionál gás naturál no líkidu, inklui produsaun hosi instalasaun sira iha tasi-klaran.

Tuir Prezidente ANPM, desizaun faze 3C investimentu ne’e pasa ona liuhosi avaliasaun rigoroza, ho konsiderasaun ba fluxu traballu krítiku relevante, inklui análize ekonómiku no téknika ba estratejia akizasaun no konteúdu lokál inklui aprovasaun regulamentár atu prezerva valór ekonómika hosi projetu.

“Hosi inísiu, ita haree katak faze 3C hanesan oportunidade atu masimiza rekuperasaun ikus ba iha kampu Bayu-undan. Ida-ne’e hanesan desizaun ida kalkulativu tebes hosi ANPM, tanba ita opera iha rezime rekuperasaun kustu, tanba ne’e ita halo evaluasaun ho kuidadu tebes,” nia hatutan.

Maski nune’e, Prezidente ANPM konsidera dezafiu ba dezenvolvimentu ne’e maka atu mobiliza ema hirak ne’ebé serbisu iha Bayu-undan hosi fatin sira afetadu COVID-19.

“Susesu hosi posu dahuluk fó prova katak ita-nia desizaun no aprovasaun investimentu ne’e loos tebes, ne’ebé ita daudaun bele fó esperansa foun ba Timor-Leste ho aumentu produsaun iha kampu Bayu-undan. Tanba ne’e, mai ita hein hamutuk ba posu ka mina-matan rua ne’ebé mak sei fura tuir mai,” nia subliña.

Jornalista : Florêncio Miranda Ximenes

Editora     : Julia Chatarina