Atividade vasina COVID-19, iha postu vasinasaun munisípiu Viqueque. Imajen Tatoli/Vitorino Lopes da Costa.

VIQUEQUE, 19 agostu 2021 (TATOLI)—Ekipa serbisu saúde munisípiu Viqueque maski hasoru difikuldade no limitasaun oioin, maibé kontinua ezekuta programa vasinasaun COVID-19 ho másimu no konsege atinje ona 68% populasaun mak simu ona vasina.

“Problema ne’ebé ami hasoru iha sentru vasinasaun-sira mak hanesan, mobilizasaun la’o maibé la kondís ho oráriu, transporte, komunikasaun ladún efetivu, estoke vasina no assume funsaun dobru. Tanba ne’e, liuhosi evaluasaun kada fulan atu hadi’a,” Koordenadora vasina iha Viqueque, Adelaide Maria Tilman, hateten ba jornalista Agência Tatoli, hafoin hala’o avaliasaun kona-bá vasina, iha salaun Parókia Viqueque, kinta ne’e.

Notísia relevante:Vasina doze dahuluk iha Dili atinje 71%

Kobertura vasina iha munisípiu ne’e, komesa hosi 12 abríl to’o 18  agostu  2021, haree ba progressu vasina hosi komisaun vasinasaun hosi munisípiu ne’e,  tarjetu ba grupu risku kompostu hosi grupu liña frente 20% hosi populasaun totál 11.034, idade 18 to’o 59 no idade 60 (80%) hosi populasaun na’in 32.905, totál vasina hamutuk na’in 29.809 ho persentajen (68%).

Dadus atinjimentu vasina iha postu administrativu lima ne’ebé iha munisípiu Viqueque mak hanesan kobertura vasina iha Lacluta komesa hosi  12 abríl to’o  18  agostu  vasina doze dahuluk hamutuk na’in 2.405, doze daruak na’in 487  ho totál na’in 2.892.

Postu administrativu Ossu, vasina doze dahuluk na’in 5.679, doze daruak na’in 1.256  ho totál na’in 6.935, postu administrativu Uatucarbau vasina doze dahuluk hamutuk na’in 2.410, doze daruak na’in 315 ho totál na’in 2.725.

Postu administrativu Uatulari vasina doze dahuluk hamutuk na’in 6.149, doze daruak na’in 708 ho totál na’in 6.957.

Postu administrativu Viqueque vasina doze dahuluk hamutuk na’in 24.781, doze daruak na’in 5.028 ho totál 29.809.

Iha fatin hanesan, diretór serbisu saúde munisípiu Viqueque, Francisco de Carvalho, konsidera evaluasaun ba kampaña vasina ne’e hala’o kada fulan importante hodi avalia no haree progresu liuliu haree kona-bá lakuna sira atu hadi’a.

Preokupasaun prinsipál hosi parte serbisu saúde Viqueque maka liga ho situasaun klimátika, bainhira tempu udan sei  enfrenta difikuldade boot liu tanba labele asesu estrada no posibilidade boot sei fó impaktu ba oráriu vasina.

Kona-bá estoke vasina, iha Viqueque simu faze dahuluk hamutuk vial 700, daruak vial 700 no datoluk simu vial 800.

“Ida-ne’e mak akontese probelema iha Uatulari, komunidade baku-rahun kadeira tanba ai-moruk vasina laiha, maibé ami konsege rezolve. Ami empresta vasina hosi munisípiu Baucau vial 100 hodi kobre iha Uatulari. Agora daudaun ai-moruk vasina ninia estoke iha  vial 1000 maka iha hela Viqueque,” nia hateten.

Xefe suku Matahoi, postu administrativu Uatulari,  António Amaral, prontu atu kolabora nafatin ho parte saúde atu bele simu hotu vasina kontra virus fuik ne’e.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here