Komunidade kontinua simu vasina AstraZeneca iha Sentru Saúde Comoro, segunda (09/08/21). Imajen Tatoli/António Gonçalves.

DILI, 18 agostu 2021(TATOLI)—Dadus hosi Ministériu Saúde (MS) hatudu katak, vasina COVID-19 doze dahuluk iha munisípiu Dili atinje ona 71 % no doze daruak 51%.

“Ida-ne’e seidauk atinje tarjetu ne’ebé iha, tanba ne’e  ita sei avansa makás no ohin ita avalia dezafiu no problema, nune’e ita kontinua halo sensibilizasaun ba komunidade atu bele vasina,” Vise-Ministru Saúde, Bonifácio Maucoli dos Reis, hateten iha abertura enkontru avaliasaun kampaña vasinasaun COVID-19  iha munisípu Dili, ne’ebé hala’o iha Novo Turizmu, kuarta ne’e.

Notísia relevante:Vasina iha Ermera persentajen kiik liu

Desafiu ne’ebé  Ministériu Saúde enfrenta mak hanesan, buka mekanizmu oinsa konvense ema sira ne’ebé seidauk vasina, tanba haree ba kazu iha Dili ne’e aumenta makás iha semana ida-ne’e.

Iha Fatin hanesan, sekretáriu munisípiu Dili, António Moniz Clau, konsidera enkontru avaliasaun  ba kampaña vasinasaun COVID-19  iha Dili  importante, tanba bele hatene atinjimentu númeru vasina.

Tuir tarjetu, iha munisípiu Dili tenke atinje 100% hosi populasaun 213.800, maibé oras-ne’e foin atinje doze dahuluk 71% no doze daruak 51%, maihosi ema vasinadu hamutuk 151.075 no seidauk vasina 62.725.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here