Timoroan deportadu na’in 352, iha hela fronteira Batugade, kinta (19/08/21). Imajen MI.

BOBONARO, 19 agostu 2021 (TATOLI)—Autoridade seguransa Indonézia liuhosi Komandu Polísia  (KAPOLRES, sígla indonézia) Belu, no Imigrasaun Indonézia, deporta timoroan na’in 352 mai Imigrasaun Timor-Leste (TL) hafoin hetan detensaun iha área Atambua.

Timoroan hirak-ne’e deportadu tanba hakat fronteira terrestre klandestinamente, liu hosi dalan ilegál ho objetivu atu partisipa serimónia ka ezame arte marsiál iha Atambua, provínsia Nusa Tenggara Timur (NTT).

Notísia relevante:Ema na’in 21 fa’an kuda ilegál iha fronteira Covalima

Informasaun ne’ebé Agência Tatoli asesu katak, timoroan hirak-ne’e, voluntariamente entrega-an ba autoridade seguransa Indonézia-nian, ikus mai enviadu espesiál Governu TL lidera hosi Longuinhos Monteiro, halo koordenasaun ho Autoridade Indonézia nian iha Kupang no konsege lori mós estudante na’in 35 ne’ebé durante ne’e hela iha konsuladu Atambua, tanba pasaporte kaduka no viza inválidu.

Alende ne’e, ekipa koordenasaun ne’e mós konsege lori timoroan na’in 85 ne’ebé la kondege ba Inglatera, tanba kestaun administrativu demoráriu iha Bali.

Komandante Unidade Patrullamentu Fronteira (UPF), Superintendente Xefe, Euclides Belo, deklara  katak, iha prosesu identifikasaun, timoroan hirak-ne’e maioria involve iha grupu arte marsiál.

“Ohin ofisialmente autoridade seguransa Indonézia-nian, ho ekipa tomak entrega hikas timoroan ho totál 352 ne’ebá atravesa ilegalmente ba Indonézia hodi tuir graduasaun arte marsiál,” Superintendente Xefe Euclides Belo hateten ba jornalista-sira, iha pontu entrada Mota-ain, kinta ne’e.

Parte polísia halo ona identifikasaun no entrega ona ba Sentru Integradu Jestaun Krize (SIJK), transporta ba Dili hodi submete ba kuarentena durante loron 14, hafoin loke prosesu investigasaun tuir lei TL.

Tuir dekretu Governu númeru 18/2021, 1 jullu kona-bá medida ezekusaun deklarasaun Estadu emerjénsia efetua hosi dekretu Prezidente Repúblika númeru 39/2021, juñu ne’e iha artigu 7, obrigatóriu kontrola sanitária, iha alinea 4 hateten individu ne’ebé tama sai territóriu nasionál ho tuir dalan ilegál sei hetan koima ho valór  mínimu $30 no másimu $250, maibé tenke kumpre uluk kuarentena durante loron 14, hafoin investiga no aplika multa.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here