Prezidente Konsellu Veteranu, Vidal de Jesus "Riak Leman". Imajen TATOLI/Arminda Fonseca.

DILI, 18 agostu 2021 (TATOLI)—Prezidente Konsellu Veteranu, Vidal de Jesus “Riak Leman”, hateten veteranu idade minoridade ne’ebé kontribui no partisipa luta iha ai-laran sei hetan direitu pensaun.

Notísia Relevante: Ekipa Nasionál halo verifikasaun ba dadus veteranu rejistadu iha 2009

“Veteranu ne’ebé mak partisipa luta iha ai-laran ho idade minoridade ne’e iha direitu atu hetan pensaun hosi Estadu. Tanba, maske nia sei ki’ik-oan maibé nia partisipasaun másimu no nia kontribuisaun barak iha prosesu luta ba independénsia nian, entaun ita mós tenke konsidera,” Riak Leman hateten ba Agência Tatoli, liuhosi telefónika, kuarta ne’e.

Bainhira ema ida mak kontribui no halo sakrifísiu ba prosesu luta independénsia nian mak komisaun tenke konsidera no rona nia istória kona-ba nia servisu durante luta iha ai-laran ne’e.

“Ita halo verifikasaun ba dadus veteranu ne’e, la’ós haree ba nia idade kiik ka boot. Tanba dala ruma labarik ki’ik-oan nia partisipasun no kontribuisaun maka’as liu fali ema boot. Tanba ne’e, ba ha’u, sira iha direitu atu hetan duni pensaun,” nia dehan.

Maske seidauk iha lei ida-ne’ebé mak ko’alia kona-ba veteranu ho idade kiik nia partisipasaun iha luta ne’e, maibé sira nafatin iha direitu ba pensaun.

Konsellu Veteranu foin mak hamriik, nia dehan, ne’ebé labele halo buat hotu dala ida maibé komisaun ho nia estrutura tomak mós tenke haree ba nia servisu no kontribuisaun sira-ne’e.

Entretantu, Gil Sarmento da Costa no ‘Lawai’ hatutan iha tempu ne’ebá sira halimar hamutuk de’it no kódigu ‘Naga Funu’ ne’e atuál Prezidente Repúblika, Francisco Guterres Lú Olo, rasik mak fó kódigu ne’e.

“Naga Funu ne’e Prezidente mak hanaran nia, tanba ne’e mak horisehik ami mai marka audiénsia no ohin Prezidente Repúblika konvida duni ami hasoru nia. Ami mai hasoru ne’e tanba uluk ami ho idade ne’ebé ki’ik-oan, dala ruma ba verifika ami-nia dadus, ho idade ne’ebé mak kiik ema la fiar. Tanba ne’e mak ami marka audiénsia ho Prezidente Repúblika para fó netik despaixu ruma ba ami na’in-rua nia dokumentu atu sai hanesan referénsia ka dokumentu legál ida, nune’e ami bele aprezenta,” nia informa.

Tuir sira na’in-rua (2), Gil Sarmento da Costa no ‘Lawai’, sira na’in-rua la’ós ema luta na’in tanba iha tempu ne’ebá sira-nia idade kiik maibé saida mak sira halo iha ai-laran ne’e Prezidente Repúblika mós hatene.

“Ohin, ami mós rekomenda ba Prezidente Repúblika no Prezidente Repúblika hateten buat ketak ida, lei kona-ba veteranu buat ketak ida. Tanba-ne’e mak karik iha lei ruma ko’alia kona-ba direitu labarik, ne’e só sira iha Komisaun Homenajen mak prepara fali lei ruma atu nune’e labarik iha TL bele hetan mós direitu,” nia hateten.

Iha biban ne’e, Prezidente Repúblika Francisco Guterres Lú Olo mós husu ba sira na’in-rua labele laran taridu, maibé karik iha verifikasaun mak iha buat ruma mak prejudika dokumentu ruma, bele fila mai hasoru Prezidente Repúblika.

Jornalista : Osória Marques

Editór       : Cancio Ximenes

1 KOMENTÁRIU

  1. W hkeak husu dt ba nai Vererano sra
    Tmba xa ema nb kontribui funu makas Komando ga fatin sentru ba funu no sra nx luta n durante 24 anos
    No balu sai vitima ba kilat musan balu mate balu kanek no feto balu hetan abuzu seksual husi feto sra,no funu nain sra n iha apelo ga evidensia barak kona ba kontribuisaun ga fo an ba mate htu kedas,
    Mais prosesu da liu husi selesaun ga Ou verifikasaun sra hlo paete ba 8-14 ba leten maybe sra tnke hetan 4-7 n,
    Mais ema nb desde funu ladun kontribui hetan 8-14 ba leten
    No balu hlo funu ha 75 mai to 80 dt hetan 814 no blu foin mk kontribui iha 99 mos hetan 814 no pior liu da nb lkoin ukun ga Milisia sra n nmk ohin foti veteranus permanenete fli duke sra funu nain sra,
    Funu nain ga veteranus barak mk gra ci abandona hla no la hetan vetranos Liuliu iha Suco holarua same Manufahi
    Komando da Luta RIMORI
    ESKLARESIMENTO husi Gerasaun patriota Juliao vicente do Rosario Nudar mos Veteranu nx oan💪

HAKEREK NO HATÁN

Please enter your comment!
Please enter your name here