Reprezentante Governu Portugál iha Timor-Leste (TL), Cristina Isabel Faustino hamutuk ho reprezentante Fundu Nasaun Unida ba Infánsia (Unicef), Shyam Pathak, entrega simbólikamente konsentradór oksijéniu hamutuk unidade 15 ba diretór interinu SAMES, Francisco Borges, iha salaun SAMES, Kapung Alor, kuarta (18/08). Imajen Tatoli/Francisco Sony.

DILI, 18 agostu 2021 (TATOLI)—Governu Portugál liuhosi Embaixada iha Timor-Leste (TL) hamutuk ho Fundu Nasaun Unida ba Infánsia (Unicef) entrega konsentradór oksijéniu hamutuk unidade 15 ba Ministériu Saúde (MS) liuhosi Serbisu Autónomu Medikamentu no Ekipamentu (SAMES), hodi apoia luta kombate propagasaun COVID-19.

“Kazu iha Dili aumenta makás, entaun apoiu ida-ne’e imediatamente hodi atende liuliu ba kazu ne’ebé grave,” Reprezentante Embaixadór Portugál iha TL, Cristina Isabel Faustino, hateten iha serimónia entrega ne’ebé hala’o iha edifísiu SAMES, Kampung Alor, kuarta ne’e.

Notísia relevante:COVID-19: óbitu rua, pozitivu 226 no ativu 2.507

Iha fatin hanesan, parte Unicef kongratula MS ne’ebé iha kompromisu boot hodi responde ba propagasaun COVID-19 no esforsu atu bele aseguru ema hotu-hotu hosi virus ne’e.

Alende ne’e, louva mós SAMES ne’ebé ho papél importante hodi jere no distribui abastesimentu médiku no vasina iha Timor laran tomak ho di’ak.

“Termu  entrega ne’e importante tebes, tanba haree kazu iha Dili no munisípiu aumenta. Ema balun presiza kuidadu iha sentru izolamentu ho nesesidade atu asegura katak, fasilidade saúde preparadu atu apoia ema ne’ebé presiza tratamentu uza oksijéniu. Tanba ne’e, konsentradór oksijéniu ne’e hanesan aparellu importante no nesesáriu ba pasiente ne’ebé persiza kuidadu espesiál,” Xefe Unidade Saúde Unicef, Shyam Sharan Pathak, konsidera.

Nune’e mós reprezentante MS, Francisco Borges, hateten konsetradór oksijéniu hirak-ne’e sei utiliza ba pasiente ne’ebé ho COVID-19  liuliu kazu moderadu no problema respirasaun.

Tanba ne’e, ekipamentu hirak-ne’e sei  utiliza iha izolamentu-sira liuliu Vera Cruz no Lahane no mós iha sala ICU sira ne’ebé instaladu iha Ospitál rejionál-sira hanesan Covalima no Maliana.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here