Komunidade simu vasina AstraZeneca iha Sentru Saúde Formoza, Dili, kuarta (04/08). Imajen Tatoli/Francisco Sony.

DILI, 18 agostu 2021 (TATOLI)— Sala Situasaun, Sentru Integradu Jestaun Krize (SIJK), rejista kazu óbitu rua, pozitivu 226, rekoperadu 63 no  kazu ativu 2.507.

Óbitu  na’in-rua  ne’e kompostu hosi inan isin-rua, ho nia oan iha isin, enkamiña hosi HNGV iha 08 agostu  2021, ho diagnóstiku G6P5A0 (isin-rua dalima, tu’ur-ahi dala lima, la iha istória abortu), isin-rua semana 24, ho mós diagnostiku bronkopneumonia tanba COVID-19 (Cycle Threshold 17,2), ho sintoma respiratorius.

Notisia relevante:COVID-19: óbitu lima, pozitivu 247 no ativu 2.349

“Ohin dader 10:45 iis-kotu tanba multiple organ failure. Oan iha inan nia kanotak mós la salva. Família koordena hela ho ekipa saúde atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kuarta ne’e.

Kazu foun ohin 226 hosi Dili 167, Covalima 18, Manufahi 10 no munisípiu seluk 31 kompostu hosi mane 118 no feto 107.

Hosi totál kazu detetadu foun ohin, ho idade 20-38(24,2) entre tinan 12-59 na’in 179 (79,2%), idade 60 mai karaik  na’in-sia. Hosi kazu detetadu foun ohin 85 kazu  ka 37,6% sintomátiku (hatudu sintomas).

Kumulativu kazu konfirmadu sura hosi 21 marsu 2020 to’o 18 agostu 2021 hamutuk 13.155. Hosi horisehik mai ohin, teste ne’ebé Laboratóriu Nasionál Saúde halo hamutuk 756 PCR, ho detallu hanesan tuir-mai, Vijilánsia sentinela na’in 26, rastreiu ba kontaktu ka Contact tracing 370,  Rastreiu Aleatóriu  ka Random Screening nain 54, viájen sai-hosi serka sanitária hosi Dili 215,  Viájen internasionál na’in 30, Follow up iha kuarentena na’in 91.

Totál testes PCR ne’ebé halo horisehik 17 agostu iha munisípiu-sira seluk, RAEOA no HNGV hamutuk 366, ho detalla hanesan tuir-mai, Maubisse 46, Maliana 41, Viqueque 17, Suai 38, Baucau 47,  Ermera 11  RAEOA 16 no HNGV 150.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 18  agostu tuir sistema informasaun Saúde iha Ministériu Saúde  ho totál  kumulativu 1ª doze iha Dili (71,5%) no  totál  kumulativu 2ª doze  iha Dili (51,4%).

Ema ne’ebé simu ona vasina doze dahuluk iha Timor-Leste  (46,2%) no simu ona doze daruak (19,0%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 13,9/100 mil abitante,  enkuantu ba de’it munisípiu Dili,33,6/100 mil abitante.

Iha semana ida-ne’e, insidénsia iha munisípiu Covalima ho insidénsia  10,3/100 mil.  Ermera 12,6/100 mil tuir kedan ho  RAEOA  ho insidénsia 12,3/100 mil. Ida-ne’e hatudu katak, insidénsia iha Dili no munisípiu

Iha 18 agostu  2021, izolamentu Vera Cruz halo tratamentu ba kazu detetadu na’in 59, iha área obstetrisia na’in 11 no iha medisina interna na’in 40,  iha sirurjia na’in-hitu, pediatria na’in-ida. Iha obstetrisia  na’in 11 kategoria kamán-hotu.

Iha área medisina interna na’in 40. Na’in 19 kategoria grave (ida uza ventiladór)  na’in 18 uza oksijéniu, na’in 13 kategoria  moderadu, ualu  kategoria kamán. Sira na’in-hitu  iha sirurjia kategoria kamán hotu, na’in-ida pediatria kategoria kamán.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan mak sei baixa ho kategoria moderadu no grave.

Apela ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan mak uza máskara,fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak  hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here