Polísia Tránzitu Munisípiu Dili sei aprezenta motorizada hamutuk 400-resin inklui karreta besik 10 ba Ministériu Públiku atu halo leilaun ba públiku. Imajen Tatoli/Eugénio Pereira.

DILI, 18 agostu 2021 (TATOLI)—Polísia Nasionál Timor-Leste (PNTL), liuhosi Diresaun Nasionál Tránzitu no Seguransa Rodoviária (DNTSR), halo apreensaun ba motór hamutuk 66.

Ekipa Tránzitu halo apreensaun ba motór hirak-ne’e liuhosi pasa revista iha tersa (17/08) lorokraik, iha área Palásiu Governu hodi intensifika serbisu no halo kontrolu ba movimentu transporte iha estrada públiku, ne’ebé kontra kódigu estrada.

Notísia relevante:Polísia tránzitu Dili halo apreensaun ba motór-karreta 138

Sub Xefe DNTSR, Inspetór Xefe Polísia, Inocêncio Freitas, hateten prezensa polísia iha dalan públiku, hodi halo jestaun ba viatura no tuir orientasaun Komandu  hodi regulariza seguransa rodoviária, liu-liu haree ba karta kondusaun no mós asesores transporte-sira hanesan xapa matríkula, espellu no lampu laiha sei konsidera hanesan infrasaun, no ba transporte ne’ebé dokumentu inválidu durante Estadu emerjénsia konsidera vale nafatin.

Atividade pasa revista ne’e mós konsege prende motorizada Governu  tolu, motór privada 61, inklui dokumentu motór rua, nune’e hamutuk 66 tanba viola kódiku estrada.

Motorista-sira  kontra ona lei kódigu estrada, no  tenke kompleta uluk prosesu administrasaun hodi selu multa iha banku, hafoin bele mai foti motorizada.

Hafoin atividade pasa revista, ekipa Tránzitu transporta kedan motorizada hirak-ne’e hodi asegura iha kuart’el jerál PNTL Caicoli.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here