Pesoál saúde iha Sentru Saúde Formoza, prepara hela vasina AstraZeneca, kuarta (04/08). Imajen TATOLI/Francisco Sony

DILI, 17 agostu 2021 (TATOLI)— Sala Situasaun, Sentru Integradu Jestaun Krize (SIJK), rejista kazu óbitu lima, pozitivu 247, rekoperadu 37 no kazu ativu 2.349.

“Totál óbitu na’in-lima kompostu hosi adultu na’in-rua no na’in-tolu mate iha inan nia kanota,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, tersa ne’e.

Notisia relevante:Taxa insidénsia COVID-19 TL sa’e ba 11,2 iha semana ikus

Óbitu mane adultu ne’e primeiru mane ida idade 41, timoroan, hela iha Ermera, diagnostikadu iha loron 09 agostu 2021, ho sindroma insufisiénsia respiratória aguda (SIRA) tanba COVID-19 (Teste PCR nia resultadu pozitivu, Cycle Threshold: E gene 31,7).

Matebian iha istória anemia krónika tanbá Multiple Mieloma (tipu ida husi leusemia). Transfere ba Vera Cruz iha loron ne’e kedan no hala’o tratamentu, tuir protokolu tratamentu ba COVID-19.

Iha tuku 17:00 loron 16 agostu, matebian iis-kotu tanbá multiple organ failure. Teste PCR hafoin iis-kotu nafatin pozitivu (CT E gene 19,6; N 21,3). Família koordena ona ho ekipa saúde atu hala’o funerál tuir protokolu ne’ebé adopta iha Timor-Leste (TL).

Adultu ida seluk feto, timoroan ida ho idade 37, enkamiña hosi HNGV, iha 12 agostu 2021, ho diagnóstiku G2P1A0 (isin-rua daruak, tu’ur-ahi dala ida, laiha istória abortu), isin-rua semana 40, ho mós diagnostiku Covid-19 (CT 27), ho sintomas respiratorius. Loron 16 agostu kalan, hahú prosesu tu’ur-ahi, maibé tuku 01:00 dader, 17 agostu, inan iis-kotu tanba amnion liquid embolia. Oan iha inan nia kanotak mós la salva.

Familia koordena hela ho ekipa saúde atu hala’o funerál tuir protokolu ne’ebé adopta iha TimorLeste.

Bebé mate iha inan nia kanotak hosi inan isin-rua G3P1A1, ho idade semana 28. Inan iha kondisaun estável, maibé ho diagnostiku COVID-19. Bebé ida mate iha inan nia kanotak hosi inan isin-rua G4P2A1, semana 33. Inan sintomatico ho diagnostico COVID-19, agora kondisaun estável, hahú 12 agostu 2021.

Kazu foun ohin 247 hosi Dili 192, Ermera 24, Bononaro 12, RAEAO 12,  no munisípiu seluk na’in-hitu ne’ebé kompostu hosi mane 128 no  feto 119.

Hosi totál kazu detetadu foun ohin, ho idade 20-60 (24,2) entre tinan 12-59 na’in 174 (70,4%), idade 60 mai karaik na’in 13. Hosi kazu detetadu foun ohin 96 kazu ka 38,9% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 17 agostu 2021 hamutuk 12.929. Hosi horisehik mai ohin, teste ne’ebé Laboratóriu Nasionál Saúde halo hamutuk 993 PCR, ho detallu hanesan tuir-mai, vijilánsia sentinela na’in 49, rastreiu ba kontaktu ka Contact tracing 512, rastreiu aleatóriu  ka Random Screening na’in 163, viájen sai-hosi serka sanitária hosi Dili 106, viajen internasionál na’in-ida, follow up iha kuarentena na’in 62.

Totál testes PCR ne’ebé halo horisehik 16 agostu iha munisípiu-sira seluk, RAEOA no HNGV hamutuk 222, ho  detalla hanesan tuir-mai, Maubisse 11, Maliana 54, Viqueque  14, Suai laiha, Baucau 47,  Ermera ualu, RAEOA 22 no HNGV 66.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 17 agostu tuir sistema informasaun saúde iha Ministériu Saúde  ho totál  kumulativu 1ª doze iha Dili (71,2%) no  totál  kumulativu 2ª doze  iha Dili (50,3%).

Ema ne’ebé simu ona vasina doze dahuluk iha Timor-Leste (45,6%) no simu ona doze daruak (17,8%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 13,1/100 mil abitante, enkuantu ba deit munisípiu Dili,29,5/100 mil abitante.

Iha semana ida ne’e, insidénsia iha munisípiu Covalima ho insidensia 12,7/100 mil. Ermera 15,6/100 mil tuir kedan ho  RAEOA ho insidénsia 12,3/100 mil.

Ida-ne’e hatudu katak, insidénsia iha Dili no munisípiu Ermera nian maka’as-liu, entaun  munisípiu hotu hotu-maka iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 17 agostu 2021, izolamentu Vera Cruz halo tratamentu ba kazu detetadu na’in 48, iha área obstetrisia na’in 14 no iha medisina interna na’in 27, iha sirurjia na’in-neen, pediatria na’in-ida. Iha obstetrisia na’in 14 kategoria kamán hotu.

Iha área medisina interna na’in 27. Na’in 14 kategoria grave (ida uza ventiladór) na’in 13 uza oksijéniu, na’in-sia kategoria moderadu haat kategoria kamán. Sira na’in-neen iha sirurjia kategoria kamán hotu, na’in-ida pediatria kategoria kamán.

Númeru kazu moderadu no grave ne’ebé baixa iha Vera Cruz, hatudu  katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Hakarak informa ba públiku katak, rezultadu sekuensiasaun genómica amostra 20 husi kazu pozitivu iha munisípiu Ermera, ne’ebé Laboratóriu Nasionál Saúde haruka iha 29 jullu 2021 ba Peter’s Doherti Institute iha Melbourne, Austrália, ho pedidu atu halo análize urjente, hetan ona resposta preliminár, iha 07 agostu 2021.

Rezultadu sekuensiasaun genómika hadutu katak, amostra hosi ema na’in 12, iha lineajen B.1.617.2 (Delta), variante ne’ebé preokupante, ka ‘variant of concern’.

Sira na’in 12 ne’e, balun hala’o izolamentu terapeútiku iha fasilidade ne’ebé Governu prepara, balun halo izolamentu terapeútiku domisiliár.

Rezultadu hirak-ne’e hatudu katak, variante preokupante Delta nakda’et ona iha komunidade Ermera nia le’et.

Aproveita informa mós ba públiku katak, fatin atu halo teste PCR maka hanesan tuir-mai bainhira sente moras isin-manas, mear, kakorok moras ka sintoma seluk tan bele ba konsulta iha Sentru Saúde ne’ebé besik, atu bele halo swab.

Bainhira atu husu autorizasaun esepsionál sai hosi/tama serka sanitária iha Dili bele ba halo swab iha Centro Convenções Dili (CCD).

Bainhira sente katak, sai kontaktu-besik ba ema ruma ne’ebé detetadu pozitivu ona, no seidauk hetan kontaktu hosi ekipa konjunta saúde bele liga ba númeru 119 atu organiza oinsá foti swab.

Apela ba populasaun iha Dili laran no mós iha munisípiu sira seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, bainhira sente isin-manas, ka kakorok moras, ka inus-ben, ka mear, hodi bele hetan atendimentu husi profisionál saúde sira.

Bainhira sedu liu hatene se virus ne’e kona ita ka la’e, di’ak liu, hodi nune’e bele hetan atendimentu sedu liu, no prevene tama ba iha situasaun ne’ebé hanaran sindroma insufisiénsia respiratória aguda (SIRA), ka susar/difisil atu dada-iis.

Ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak  hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here