Produtu lokál Timor-Leste atu lori aprezenta iha Expo Dubai 2020, kuarta (02/06). Imajen TATOLI/Francisco Sony

DILI, 17 agostu 2021 (TATOLI)–Ministériu Koordenadór Asuntu Ekonómiku (MKAE) prezide reuniaun koordenasaun entre liña ministeriál, setór privadu no setór kooperativa hodi halibur ideia ba prepasaun Expo Dubai 2020.

Ita hein enkontru ohin bele hetan ideia ruma hosi setór privadu no kooperativa sira kona-ba preparasaun delegasaun Timor-Leste atu partisipa iha eventu mundiál ne’e,” Ministru Koordenadór Asuntu Ekonómiku, Joaquim Amaral, hateten, iha salaun City 8, Manleuana, tersa ne’e.

Governante ne’e konsidera, Timor-Leste deside partisipa iha eventu ne’e tanba haree ba oportunidade di’ak atu promove produtu lokál iha nível mundiál.

“Hanesan nasaun kiik, ita-nia presu pozisiona ita-nia an iha merkadu globál, tanba ne’e ita aproveita eventu boot sira hodi ema bele koñese Timor-Leste nia potensialidade ne’ebé iha no fasil atu ko’alia kona-ba investimentu,” nia akresenta.

Notísia relevante: Timor-Leste partisipa Expo Dubai 2020 lori tema ‘explore the undiscovered’

Timor-Leste hanesan rai kiik, tanba ne’e ein termu ekonomia mós tenke integra ba komérsiu globál hodi ajuda investidór bele koñese no sente seguru atu halo investimentu iha rai-laran.

“Liuhosi enkotru ohin, bele partilla ba setór privadu atu prepara-an didi’ak kuandu ba partisipa iha Expo Dubai, sira bele kria rede negósiu, nune’e investidór sira bele haree no mai investe iha ita-nian rai,” nia subliña.

Promosaun ba potensialidade ba investidór

Iha fatin hanesan, Diretór Ezekutivu Trade Invest Timor-Leste, Arcanjo da Silva, hateten, enkontru ne’e objetivu atu parte Governu, setór privadu no kooperativa bele koordena molok partisipa Expo Dubai.

Papél setór privadu iha partisipasaun eventu munidál ne’e importante tebes tanba sei iha business forum hodi halo promosaun ba potensialidade Timór ba investidór sira.

“Bainhira ita organiza business forum iha Expo Dubai, aban bain-rua investidór no exportadór potensiál mai investe iha ita-nia rai hodi haburas ekonomia. Tanba ne’e, presiza halo interasaun ho setór privadu no kooperativa tanba sira mak hanesan ajente ekonómiku atu ezekuta dezenvolvimentu ekonómiku,” nia akresenta.

Tuir Diretór ne’e, Governu hakarak fasilita ajente ne’ebé atu dezenvolve di’ak liután setór ekonomia.

“Se ita atrai setór privadu internasionál sira mai, maibé ita la halo koordenasaun di’ak ho ita-nia uma laran ka ita-nia setór privadu nasionál, entaun bele dehan investidór barak mak mai domina fali ho sira, entaun ita tenke preparadu,” nia hatutan.

Nune’e mós, Prezidente Autoridade Expo Dubai 2020, Manuel Vong, hateten, setór privadu Timor-Leste sei promove kestaun importante haat iha Expo Dubai, hanesan setór agrikultura, peska, turizmu no ospitalidade, transporte lojístika, infraestrutura estratéjika, petróleu no minerál.

Aleinde ne’e, nia konsidera diplomasia ekonomia ne’e importante tebes atu promove iha Expo Dubai.

“Enkontru ne’e, Governu hakarak enkoraja ita-nia setór privadu sira no kooperativa sira-nia partisipasaun iha Expo Dubai atu buka oportunidade negósiu atubele partisipa iha  forum internasionál,” nia subliña.

Daudaun, preparasaun Timor-Leste partisipa Expo Dubai atinje ona 99%.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here