Produtu lokál Timor-Leste atu lori aprezenta iha Expo Dubai 2020, kuarta (02/06). Imajen TATOLI/Francisco Sony

DILI, 01 jullu 2021 (TATOLI)–Ministru Turizmu, Komérsiu no Indústria (MTKI), José Lucas do Carmo da Silva, nu’udar Autoridade Nasionál Timor-Leste ba Expo Dubai 2020 (ANED-TL) no Koordenadór Jerál, Manuel Vong, halo aprezentasaun iha reuniaun Konsellu Ministru (KM), kona-ba andamentu serbisu preparasaun prezensa iha eventu internasionál ne’e.

Expo Dubai 2020 sei realiza iha Dubai, iha Emiradus Árabe Unidu, entre loron 01 outubru 2021 no loron 31 marsu 2022 no espozisaun mundiál dahuluk iha Médiu Oriente.

“Eventu globál ne’e ho lema ‘Tau neon hamutuk, hodi harii futuru’, ho sub-tema ‘Mobilidade, Sustentabilidade no Oportunidade’, ne’ebé sei partisipa hosi nasaun 190 resin. Timor-Leste sei marka prezensa iha área temátika ‘Oportunidade’ ho tema ‘Timor-Leste, Explore the undiscovered’,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kinta ne’e.

Notísia relevante: Orsamentu partisipasaun Timor-Leste ba Expo Dubai 70% hosi apoia externa

Eventu boot ne’e, sei permite Timor-Leste promove kultura, paizajen no rikusoin naturál inklui ninia produtu ba ema tokon ba tokon hodi atrai potensiál investidór no vizitante sira.

Durante aprezentasaun, halo mós rezumu atividade preparasaun ne’ebé hala’o no alkansa ona 95%.

Aprezenta mós atividade programátika sira ne’ebé prevee durante iha Expo Dubai, liuliu eventu sira ne’ebé sei hala’o iha loron nasionál Timor-Leste, ne’ebé sei selebra iha loron 18 outubru.

Jornalista : Antónia Gusmão

Editora     : Julia Chatarina

3 KOMENTÁRIU

  1. Expo Dubai hanesan Opurtunidade diak ida atu promove turismo sira iha Timor leste nune ami povu kiik husu ba ministerio turismu fila fali mai karik tengki fokus makas ba fatin sira nebe maka halo ona promosaun,liu-liu hegiene:sintina fatin tenki loke 24 oras,iha kristu rei tuku lima deit toilet sira nee taka ona,fatin sira nee tengki seguru ba kiik oan sira,atendementu iha restorante sira tengki mos karik persija tengki fo formasaun ba sira,tau matan mos ba taksista sira nebe maka tula ema turista sira,folin sasan iha hotel tengki kompetativel alias manan oitoan maibe bei beik ne diak liu,fo formasaun mos ba matadalan turista sira no even organizer sira,tengki fo mos siguransa iha fatin turismu durante 24 oras se persija liu kria unidade polisia turismu iha fatin fatin turismu,ami hanoin sekarik ministerio turismu book ona sasan sira ami povu sei taka ibun kona ba partisipasaun Timor leste ba expo iha Dubai.

  2. Fatin turusmo iha Dili laran nbe kuaze aat mk barak no kresimenti Ekonomia Rai laran nbe tun mais governo la sibuk, agr imi sibuk los at ba tuir Expo iha Dubai nbe gasta orsamentu bot los ne.
    Hakarak atu jalan” ne dehan dt keta mai bosok Povo demais, imi hanoin povo ne beik nafatin atu imi bele bosok krk.

  3. Expo Dubai fo duni benefisio ba Timor-Leste, iha seitor economi, agriculta no Turismo, maibe Governo mos tenke konsentra hodi hadia sistema iha Rai laran,

    Nb: se ita hanoin oan ba fan an iha expo international sira hnsn NE,. Ita mos presija investe makas hodi hadia, lae fan an iha expo mos gasta tempo no gasta osan.

HAKEREK NO HATÁN

Please enter your comment!
Please enter your name here