Gabinete Apoia Sosiedade Sivíl (GASC sígla portugés), hala’o diálogu ho membru KONSSANTIL, munisipiu Bobonaro, Liquiça no Ermera, hodi konsulta kona-bá mekanizmu no prioridade hadi’a ai-han iha Timor-Leste (TL), iha salaun eis-kodim, suku Ritabou, postu administrativu Maliana, munisípiu Bobonaro, tersa (17/08/21). Imajen Tatoli/Sérgio da Cruz.

BOBONARO, 17 agostu 2021 (TATOLI)—Gabinete Apoia Sosiedade Sivíl (GASC sígla portugés), hala’o diálogu ho membru KONSSANTIL, munisipiu Bobonaro, Liquiça no Ermera, hodi konsulta kona-bá mekanizmu no prioridade hadi’a ai-han iha Timor-Leste (TL).

Pontu vokál diálogu sub nasionál kona-bá sistema ai-han iha Timor-Leste, Filipe da Costa Barreto, esplika, objetivu hosi diálogu ne’e, atu husu opiniaun no rekomendasaun hosi Autoridade munisipál no liña minitériu hotu-hotu inklui autoridade lokál-sira hodi hare hamutuk dezafiu no vantajen atu rekomenda ba Governu sentrál, nune’e tau iha planu prioridade hadi’a sistema ai-han iha TL.

Notísia relevante:Presiza Servisu Koletivu Kombate Inseguransa Ai-han no Nutrisaun

Diálogu sub national dialogue on food, diskute liu tópiku lima importante ba situasaun TL mak hanesan, produsaun ai-han, transportasaun no armajenamentu, prosesamentu ai-han, distribuisaun ai-han no ikus liu konsumu ai-han.

“Ita ko’alia kona-bá sistema ai-han tanbema hotu moris iha mundu presiza ai-han, maibé la’ós ema hotu-hotu fásil atu asesu ba hahán. Entaun, ita mós hasoru problema inseguransa ai-han grave, tanba ne’e halo diálogu hodi diskute tanba saida mak sistema ai-han iha TL la’o la di’ak,” Filipe da Costa Barreto, hateten ba jornalista-sira, iha salaun eis-kodim, suku Ritabou, postu administrativu Maliana, munisípiu Bobonaro, tersa ne’e.

Diálogu ne’e mós hanesan preparasaun ida, nune’e delegadu Timor-Leste ne’ebé atu ba partisipa Simeira sistema ai-han iha Nova Yorke iha setembru, bele partilla prátika sistema ai-han di’ak TL.

Liuhosi diálogu ida-ne’e mós bele prepara planu orsamentu tinan ida-ne’e nian atu bele reforsa di’ak liu tan sistema ai-han iha rai laran, nune’e bele redús númeru mal nutrisaun iha TL.

Biban ne’e, Prezidente Autoridade munisípiu Bobonaro, Ernesto Barreto de Oliveira, agradede tanba Governu bele hola inistiva atu halo diálogu no husu mós liña ministériu-sira atu kontribui hanoin ruma, nune’e bainhira delegadu sira ba partilla hanoin iha Nova Yorke, bele hatudu rezultadu di’ak.

Nune’e mós Prezidente autoridade Munisipál Ermera, Eusébio Salsinha agradese ba Governu no fiar katak liuhosi diálogu ne’e bele hadi’a sistema ai-han di’ak iha TL.

Sorin seluk, Diretór serbisu Agrikultura munisípiu Bobonaro, Adérito dos Santos, hateten daudaun ne’e Bobonaro iha estensionista na’in 46, ne’ebé sei esforsu hela iha baze atu motiva agrikultór-sira hasa’e produsaun iha rai-laran.

Diálogu ne’e hetan partisipasaun hosi liña ministériu hosi munisipiu Bobonaro, Liquiça no Ermera, Grupu agrikultura, grupu indústria kiik no setór privadu.

Aktividade sub National dialogue on food system ne’e, tuir planu sei realiza iha munisipiu Manufahi ne’ebé sei konvida autoridade hosi munisípiu seluk.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here