Ministru Agrikultura no Peska, Joaquim José Gusmão dos Reis Martins, akompaña husi Reprezentante UNICEF iha Timor Leste, Valérie Taton no Koordenador Rezidente ONU iha TL, Roy Trivedy, lansa rekomendasaun nutrisaun. Imajen/tatoli.

DILI, 18 outubru 2019 (TATOLI) – Timor-Leste enfrenta hela inseguransa ai-han ne’ebé ema barak sei hamlaha no má nutrisaun, nune’e ezije atu hamosu esforsu koletivu hodi envolve komponente hotu sosiedade nian hodi kombate kazu nasionál ne’e.

Ministru Agrikultura no Peska, Joaquim José Gusmão dos Reis Martins, afirma iha ámbitu selebrasaun Loron Mundiál Ai-han iha edifísiu Ministériu Finansa, ohin, ne’ebé mak Governu liuhosi Ministériu Saúde, Ministériu Agrikultura no Peska no Konsellu Nasionál ba Soberania, Seguransa, Ai-han no Nutrisaun iha Timor-Leste (KONSSANTIL) selebra ho tema “Diversifika Produsaun Ai-han Lokál Hodi Promove Dieta Saudavel iha Timor-Leste”.

Liuhosi relatóriu KONSSANTIL ne’ebé públika iha tinan 2018, hatudu katak populasaun Timor-Leste porsentu 36 enfrenta hela inseguransa ai-han no nutrisaun, má nutrisaun krónika 46% no aguda (pezu la tuir ho idade) 24% husi totál populasaun Timor-Leste.

Ministru Joaquim friza evidénsia hatudu katak dieta ne’ebé la saudavel mak hamoris má nutrisaun no moras oin-oin ne’ebé kada tinan Estadu hasai osan kuaze liu millaun $41.

“Ita-nia polítika zero hamlaha ne’e la’ós fó han de’it ba ema ne’ebé hamlaha, maibé fó ema saudavel atu kontinua haburas planeta ne’e. Ida ne’e nesesita duni asaun integrada husi setór hotu-hotu, atu ema hotu bele asesu ba dieta saudavel”, katak.

Loron mundiál ai-han kada tinan nasaun hotu-hotu iha mundu selebra ho objetivu atu hasa’e konxiénsia no bolu atensaun komunidade internasionál nian kona-ba problema ai-han iha nivel rejionál, nasionál no globál. Tema globál mak “Ita-Nia Asaun Mak Ita-nia Futuru”.

Haree ba Timor-Leste nia sistema ai-han, nia dehan hahú husi produsaun agríkola to’o prosesamentu merkadu iha de’it espasu uitoan ba ai-han lokál ne’ebé  mak fresku, maibé maioria liuhosi ai-han importasaun de’it.

“Mai ita refleta ba atividade sira ne’ebé mak ita halo ona atu rezolve má nutrisaun iha Timor-Leste no inseguransa ai-han tanba sai hanesan obstákulu ba dezenvolvimentu sustentavel”, ministru aviza.

Nune’e, Ministru Joaquim informa Governu estabelese ona KONSSANTIL atu dezenvolve ona polítika no enkuadramentu legál ne’ebé komprensivu hodi fasilita asaun koletiva hodi envolve liña ministeriál no sosiedade hotu hodi prioritiza asaun iha área saúde, edukasaun, protesaun sosiál, komérsiu no agrikultura atu kombate inseguransa ai-han no nutrisaun.

“Atubele promove pakote intervensaun ne’ebé komprensivu hodi diversifika produsaun ai-han lokál, nutritivu, promove ai-han saudavel no hakotu má nutrisaun iha ita-nia rai”, afirma.

ONU Kontinua Apoia TL Kombate Inseguransa Ai-han

Koordenadór Rezidente Organizasaun Nasaun Unida (ONU) iha Timor-Leste, Roy Trivedy, hatete ONU kontinua apoia Timor-Leste atu kombate kauza inseguransa ai-han no nutrisaun inklui má nutrisaun iha Timor-Leste (TL).

“Ami kontinua apoia, maibé Governu Timor-Leste mós tenke hala’o polítika ida realístiku hodi kombate inseguransa ai-han no nutrisaun iha Timor-Leste liuhusi diversifika no promove produtu lokál agríkola”, sujere.

Reprezentante Fundu Nasaun Unida ba Labarik sira (UNICEF, sigla inglés) iha Timor-Leste, Valérie Taton, hatete labarik barak tebes sofre hela ho konsekuénsia sira husi dieta ladún di’ak no sistema alimentár ne’ebé halo sira falla.

Globalmente, labarik sira idade entre fulan neen to’o tinan rua la han ai-han ne’ebé apoia sira-nia kreximentu isin no kakutak ho lalais. Ida tau sira iha risku ba dezenvolvimentu kakutak fraku, aprendizajen fraku, imunidade fraku, infesaun aumenta no iha kazu barak, mate.

“Ita hotu nia esforsu atubele halo diferensa ba labarik-sira hotu iha Timor-Leste, no bele rezulta kada labarik hetan susubeen-inan no ai-han suplementár iha tempu ne’ebé loloos nian, no hetan dieta balansu”, hateten Valérie Taton,

Atu rezolve krize má nutrisaun, nia dehan UNICEF hasai apelu urjente ba Governu sira, setór privadu, doadór sira, inan-aman sira no emprezáriu sira atu ajuda labarik sira moris saudavel.

“Ne’e la’ós batalla mak ita manán mesak. Ita presiza Governu sira, setór privadu no sosiedade sivíl atu prioritiza nutrisaun infantíl no servisu hamutuk atu rezolve kauza sira husi han la saudavel iha forma hotu”, nia konvida.

Valérie Taton dehan: “Ita deve hela ba labarik sira iha Timor-Leste atu asegura katak sira iha inísiu di’ak liu iha sira-nia moris, ne’ebé fornese direitu fundasaun atu alkansa sira-nia poténsia tomak”.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here