Uma Tradisionál (Casa típica) hosi Munisípiu Lautém kuaze koñesidu iha mundu ne’ebé reprezenta Timor-Leste no sai símbolu ba Timor-Leste nian. Imajen/Espesiál.

DILI17 agostu 2021 (TATOLI)—Sekretária Estadu Arte no Kultura (SEAK), iha fulan agostu ne’e sei fó apoiu faze daruak nian hodi halo konstrusaun no inagurasaun ba umalulik hamutuk 40 iha territóriu nasionál.

Notísia Relevante: SEAK apoia konstrusaun uma-lulik 42 iha territóriu nasionál

“Daudaun ne’e iha proposta 40 mak avansa ba apoiu segundu faze nian. Hosi uma-lulik 40 ne’e, uma lisan 12 konsidera hanesan konstrusaun, uma lisan 14 konsidera hanesan rekonstrusaun no uma lisan 14 kategoria hanesan inaugurasaun,” Diretór Nasionál Patrimóniu Kulturál, Gil Paulino S. Oliveira, hateten ba Agência Tatoli, iha nia knaar fatin, Avenida Portugal, Díli, tersa ne’e.

Hosi proposta 40 ne’e, daudaun ekipa juri halo ona diskusaun no kontaktu ona ba proposta na’in-sira hodi halo kompleta dokumentu sira-ne’ebé seidauk kompleitu, nune’e iha parte finansa bele halo pagamentu.

“Dokumentu sira kompleta hotu ona. Iha tempu badak, komu ho situasaun ida agora serka sanitária, entaun ekipa juri deside katak ekipa mak tenke dezloka no tun ba terrenu hodi lori sirania kontratu ba asina tuir kada munisípiu,” nia informa.

Iha semana ida-ne’e to’o loron 30 fulan-agostu, ekipa juri sira sei dezloka ba iha kada munisípiu lori sirania tema kontratu ne’e, hodi fó ba proponente sira atu asina iha sira ida-idak nia munisípiu.

Ba apoiu faze dahuluk nian, nia informa, totál proposta ne’ebé liuhosi ekipa juri diskute hamutuk 42 no tama ona ba prosesu finál ba iha pagamentu ninian. Maibé to’o iha prosesu pagamentu  ne’e, proposta 40 de’it mak impoin ba iha Finansa Sentrál no uma lisan rua (2) kansela tiha.

“Apoiu primeiru ne’e ba de’it uma-lulik 40 no uma lisan rua mak kansela. Uma-lulik rua ne’ebé kansela ne’e mak Bidau Manumata no Boklelo Maniking,” nia haktuir.

Governuu kansela fó apoiu ba Uma-lulik Bidau Manumata tanba hafoin asina tiha kontratu konabá atu apoiu nian, akontese entre jerasaun sira no uma-lulik na’in sira iha parte Bidau Manumata halo asaun ida, hodi sunu tiha uma-lulik ne’e.

“Sira sunu tiha uma-lulik ne’e, entaun signifika katak sira seidauk hamutuk. Tanba intensaun hosi apoiu ne’e hodi hametin relasaun família entre jerasaun sira hodi haburas sirania feto-san, no umane iha parte uma-lulik (lisan) ne’e. Maibé se mosu dezentendimentu ne’e signifika katak sira seidauk iha lia ida hodi konstrui sirania uma-lulik ne’e. Se ita ita kontinua halo pagamentu. imajen ne’e la di’ak,” nia dehan.

Nune’e mós, kansela fó apoiu ba uma-lulik (lisan) Boklelo Maniking tanba depois rezultadu juri identifika no anúnsia liuhosi mídia no konatktu sira liuhosi númeru kontaktu maibé to’o agora parte Diresaun Patrimóniu Kulturál nunka hetan informasaun ida hosi jerasaun ba uma lisan refere.

“Primeiru sira la mai asina kontratu ba apoiu nian. Ne’e signifika katak sira mak proponente, hanesan sira mak husu apoiu karik sira la halo kazu ba ida-ne’e. Hosi parte teknika, teknikamente konsidera katak ne’e sira la presiza hetan apoiu, tanbá liuhosi anúnsia no liuhosi telefóne sira la atende,” nia hateten.

Tanbá, nia dehan, SEAK nia prioridade ezekusaun tenke tuir presentazen trimestrál, signifika katak uma-lulik sira-ne’ebé la fó importánsia ba sirania proposta, entaun signifika sira iha kbiit rasik atu konstrui no la presiza hetan apoiu hosi parte Governu.

Jornalista : Nelia Fernandes

Editór      : Cancio Ximenes

HAKEREK NO HATÁN

Please enter your comment!
Please enter your name here