Komunidade kontinua simu vasina AstraZeneca iha Sentru Saúde sira. Imajen Tatoli/António Gonçalves.

DILI, 16 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu tolu, pozitivu 117, rekoperadu 41 no kazu ativu 2.141.

Koordenadór Forsa-Tarefa ba Prevensaun no Mitigasaun, Rui Maria de Araújo, liu hosi komunikadu, esplika,  kazu óbitu na’in-tolu ne’e, primeiru mane Timoroan  ho idade 60,  hela iha Dili, diagnostikadu iha  15 agostu 2021, ho sindroma insufisiénsia respiratória aguda (SIRA) tanba COVID-19 (Teste PCR nia rezultadu pozitivu, Cycle Threshold: E gene 30,4).

Notisia relevante:COVID-19: óbitu ida no pozitivu 142

Metebian iha istória insufisiénsia renál krónika (estádio terminál), no hala’o hemodiálize semana ida dala rua.

Matebian iha mós istória ipertensaun arterial ho diabetes. Transfere ba Vera Cruz iha 14:00, no hala’o tratamentu, tuir protokolu tratamentu ba COVID-19.

Maizoumenus 17:30 loron 15 agostu, matebian iis-kotu tanba multiple organ failure. Teste PCR hafoin iis-kotu nafatin pozitivu (CT E gene 31,3).

“Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste,” nia hateten.

Ida seluk maka, mane idade tinan 76, hela iha Dili, diagnostikadu iha loron 14 agostu 2021, ho sindroma insufisiénsia respiratória aguda (SIRA) tanba COVID-19 (Teste PCR nia resultadu pozitivu, Cycle Threshold: E gene 23,3).

Transfere ba Vera Cruz iha loron ne’e kedan, no hala’o tratamentu, tuir protokolu tratamentu ba COVID-19.

Maizomenus 19:00 dia 15 agostu, matebian iis-kotu, tanba tromboembolizmu pulmonar. Teste PCR hafoin iis-kotu nafatin pozitivu (CT E gene 12,2). Família koordena ona ho ekipa saúde atu hala’o funerál tuir protokolu ne’ebé adopta iha Timor-Leste.

Ida seluk tan maka, feto ida ho idade 63, Timoroan, hela iha Dili, diagnostikadu iha 12 agostu 2021, ho sindroma insufisiénsia respiratória aguda (SIRA) tanba COVID-19 (Teste PCR nia resultadu pozitivu, Cycle Threshold:E gene 21).

Matebian iha istória moras leusemia ho anemia grave. Transfere ba Vera Cruz iha loron ne’e kedan, no hala’o tratamentu, tuir protokolu tratamentu ba COVID-19.

Maizoumenus dader 5:30 16 agostu, matebian iis-kotu tanba parajem cardioresporatória. Teste PCR hafoin iis-kotu nafatin pozitivu (CT E gene 24,4). Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste.

Kazu foun ohin 117 hosi Dili 68, Covalima 15, RAEOA 10 no  munisípiu seluk  na’in 24 ne’ebé kompostu hosi mane 54 no feto 63.

Hosi totál kazu detetadu foun ohin, ho idade 20-17 (19,7) entre tinan 12-59 na’in 91(77,7%), idade 60 mai karaik na’in-sia. Hosi kazu detetadu foun ohin iha kazu  79 ka 67,5% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 16 agostu 2021 hamutuk 12.682. Hosi horisehik mai ohin, teste ne’ebé Laboratóriu Nasionál Saúde halo hamutuk 323 PCR, ho detallu hanesan tuir-mai, Vijilánsia sentinela na’in 25, rastreiu ba kontaktu ka Contact tracing  80,  Rastreiu Aleatóriu  ka Random Screening nain 69, viájen sai-hosi serka sanitária hosi Dili 106,  Viájen internasionál  laiha, Follow up iha kuarentena na’in 43.

Totál testes PCR ne’ebé halo horisehik 12 agostu iha munisípiu-sira seluk, RAEOA no HNGV hamutuk 210 ho  detalla hanesan tuir-mai, Maubisse 65, Maliana 12, Viqueque  hitu, Suai 21, Baucau 44,  Ermera la iha RAEOA 26 no HNGV 35.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00,  loron 16 agostu tuir sistema informasaun Saúde iha Ministériu Saúde  ho totál  kumulativu 1ª doze iha Dili (70,7%) no  totál  kumulativu 2ª doze  iha Dili (49,2%).

Ema ne’ebé simu ona vasina doze dahuluk iha Timor-Leste  (45,2%) no simu ona doze daruak  (16,9%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 12,0/100 mil abitante, enkuantu ba de’it munisípiu Dili,24,9/100 mil abitante.

Iha semana ida-ne’e, insidénsia iha munisípiu Covalima ho insidensia  15,4/100 mil. Tuir kedan Ermera 13,6/100 mil tuir kedan ho RAEOA ho insidénsia 11,3/100 mil no  Bobonaro  ho insidénsia  5,4/100 mil.

Ida-ne’e hatudu katak, insidénsia munisípiu Ermera nian maka a’as-liu entaun munisípiu tolu – Ermera, Dili, RAEOA ho Covalima – maka iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 16 agostu 2021, izolamentu Vera Cruz halo tratamentu ba kazu detetadu na’in 41, iha área obstetrisia na’in 12 no iha medisina interna na’in 21,  iha sirurjia na’in-neen, pediatria na’in-rua.

Iha obstetrisia  na’in 12 kategoria kamán hotu. Iha área medisina interna  na’in 21, lima  kategoria grave (ida uza ventiladór)  na’in-haat  uza oksijéniu, na’in 13 kategoria moderadu, tolu kategoria kamán. Sira na’in-neen iha sirurjia kategoria kamán hotu, na’in-rua pediatria kategoria kamán.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan mak sei baixa ho kategoria moderadu no grave.

Informa nafatin ba públiku katak, rezultadu sekuensiasaun genómica amostra 20 husi kazu pozitivu iha munisípiu Ermera, ne’ebé Laboratoriu Nasionál Saúde haruka iha loron  29 jullu 2021 ba Peter’s Doherti Institute iha Melbourne, Austrália, ho pedidu atu halo análize urjenti, hetan ona resposta preliminar, iha 07 agostu 2021.

Rezultadu sekuensiasaun genómika hadutu katak amostra hosi ema na’in  12, iha lineajen B.1.617.2 (Delta), variante ne’ebé preokupante, ka ‘variant of concern’.

Sira nian 12 ne’e, balun hala’o izolamentu terapeutiku iha fasilidade ne’ebé Governu prepara, balun halo izolamentu terapeutiku domisiliár.

Rezultadu hirak-ne’e hatudu katak, variante preokupante Delta nakda’et ona iha komunidade Ermera nia le’et.

Ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak hanesan uza máskara, fase liman beibeik ho sabaun ka dezinfetante ruma ,evita kose liman ba matan, inus ho ibun bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak  hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here