Dadus evolusaun surtu COVID-19 iha Timor-Leste, hosi loron 21 marsu 2020 to’o 15 agostu 2021. Imajen/CIGC

DILI, 15 agostu  2021 (TATOLI)—Sala Situasaun, Sentru Integradu Jestaun Krize (CIGC, sigla portugés) fó sai dadus COVID-19 iha domingu ne’e, ne’ebé rejista kazu óbitu ida, pozitivu 142, rekuperadu 13, no ativu 2.068, nune’e kazu rejistadu hahú loron 21 marsu 2020 to’o 15 agostu 2021 hamutuk 12.565.

“Kazu detetadu foun kompostu hosi Dili 92, Covalima 23, Baucau 13, Rejiaun Administrativa Espesiál Oé-cusse Ambeno 11 no munisípiu seluk tolu,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, relata liuhosi nota imprensa.

Kazu foun ba ohin loron, kompostu hosi mane 77 no feto 65, ema ho idade 12 mai kraik hamutuk 28 (19,7%), ho idade entre 12-59 hamutuk 110 (77,%) no idade 60 ba leten hamutuk haat, nune’e 46 (32,3%) sintomátiku (hatudu sintoma) no seluk asintomátiku (la hatudu sintoma).

Enkuantu kazu óbitu ba ohin loron, mane ida ho idade 76 no hanesan timor-oan, hela iha Vera Cruz, Dili, ne’ebé antes ne’e diagnostikadu iha loron 13 agostu 2021, ho Sindroma Insufisiénsia Respiratória Aguda (SIRA) tanba COVID-19, ne’ebé ho rezultadu teste Polymerase Chain Reaction (PCR) nia resultadu pozitivu.

Matebian antes ne’e iha istória moras obstrusaun pulmonar krónika (Chronic Obstructive Pulmonary Disease) no istória tratamentu tuberkuloze, nune’e iha loron ne’e kedas transfere ba hala’o tratamentu iha Vera Cruz tuir protokolu tratamentu COVID-19 no ohin dader, iis kotu tanba respiratoric failure.

“Teste PCR hafoin iis kotu nafatin pozitivu, nune’e família koordena ona ho ekipa saúde atu hala’o funerál tuir protokolu ne’ebé adota iha Timor-Leste,’’ Reprezentante CIGC dehan.

Hosi horiseik mai ohin, teste ne’ebé Laboratóriu Nasionál Saúde halo hamutuk 303 PCR, ho kompostu hosi vijilánsia sentinela ida, rastreiu ba kontaktu ka contact tracing 107, rastreiu aleatóriu ka random screening 15, viajen sai hosi serka sanitária Dili 123, viajen internasionál laiha, follow up iha kuarentena 57.

Totál teste PCR ne’ebé halo horisehik 12 agostu iha munisípiu seluk, RAEOA no Hospital Nacional Guido Valadares (HNGV) hamutuk 286, ho detalla Maubisse 51 , Maliana 15, Viqueque  la iha, Suai 69, Baucau 52,  Ermera laiha RAEOA 40, HNGV 59.

Insidénsia iha Ermera nafatin a’as

Aleinde ne’e, atubele hatene surtu ninia evolusaun nomós aumenta ka diminui, indikadór seluk ne’ebé matenek na’in epidemiolojia uza maka insidénsia, ne’ebé sukat totál kazu foun kada loron pur abitante 100.000 no hatudu risku ne’ebé populasaun iha atu hetan da’et  moras ida.

Nune’e, ho indikadór ne’e, COVID-19 iha Timor-Leste, durante loron hitu ikus maka abitante 11,2/100.000, enkuantu ba de’it munisípiu Ermera abitante 13,9/100.000. Iha semana ida ne’e, insidénsia iha munisípiu Dili abitante 23,2/100.000, tuir kedas ho RAEOA ho insidénsia abitante 10,7/100.000, hafoin ho munisípiu Covalima ho insidénsia abitante 14,0/100.000 no  Bobonaro  ho ins idénsia abitante 5,6/100.000.

“Ida-ne’e hatudu katak Insidénsia munisípiu Ermera nian maka a’as liu, entaun munisípiu tolu ne’e mak hanesan Ermera, Dili, RAEOA no Covalima maka iha risku boot liu atu populasaun hodi hetan da’et no hada’et tutan vírus COVID-19 iha komunidade nia le’et,” Koordenadór CIGC esplika.

Ohin loron, izolamentu Vera Cruz halo tratamentu ba kazu detetadu 44, iha área obstetrisia 14, medisina interna 23, sirurjia neen, pediatria ida, obstetrisia 14 ho kategoria kama’an hotu, iha área medisina interna 23, sia ho kategoria grave (ida uza ventiladór) ualu uza okxijéniu, na’in-14 kategoria moderadu, na’in-neen iha sirurjia kategoria kama’an hotu, na’in-ida pediatria kategoria kama’an.

“Númeru kazu moderadu no grave ne’ebé baixa iha Vera Cruz hatudu katak bainhira ema barak liu detetadu pozitivu, barak liu tan maka sei baixa ho kategoria moderadu no grave,” Koordenadór CIGC dehan.

CIGC apela ba públiku, atu halo teste PCR bainhira sente moras isin-manas, mear, kakorok moras ka sintoma seluk tan bele ba konsulta iha Sentru Saúde ne’ebé besik, atubele halo swab no bainhira atu husu autorizasaun esepsionál sai hosi/tama serka sanitária iha Dili, bele ba halo swab iha Centro Convenções Dili (CCD).

Bainhira sente katak sai kontaktu-besik ba ema ruma ne’ebé detetau pozitivu ona no seidauk hetan kontaktu hosi ekipa konjunta saúde bele liga ba númeru 119 atu organiza foti teste swab.

“Apela ba populasaun iha Dili laran no munisípiu seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, bainhira sente isin-manas, kakorok moras,  inus-ben, mear, hodi bele hetan atendimentu hosi profisionál saúde sira. Bainhira sedu liu hatene vírus ne’e kona ita ka la’e, di’ak liu, hodi nune’e bele hetan atendimentu sedu no prevene tama ba iha situasaun susar dada iis,” nia apela.

CIGC apela mós ba populasaun Timor-Leste laran tomak, maski karik simu ona vasina tenke respeita nafatin regra prevensaun no ijiéne individuál, ne’ebé Governu hatuur ona atu prevene moras COVID-19 da’et ba mai.

Regra sira ne’e mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak  hamriik ka tur dook hosi ema seluk, mínimu metru ida ho balun.

Jornalista : Felicidade Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here