Ilustrasaun COVID-19. Imajen/Espesial

OÉ-CUSSE, 16 agostu 2021 (TATOLI)-Rejiaun Administrativa Espesiál Oé-Cusse Ambeno (RAEOA), segunda ne’e, rejista kazu foun   COVID-19 hamutuk 11 no totál kazu konfirmadu ne’ebé kumpre hela izolamentu 99.

Notísia Relevante : SIJK rejista óbitu tolu, pozitivu 117 no ativu 2.141

“Ohin, ami rejista kazu foun pozitivu COVID-19 na’in-11  no totál kazu pozitivu iha Oé-Cusse hamutuk na’in-99 daudaun ne’e kumpre  hela iha sala izolamentu Portu Kitahara Mahata no balun iha Klínika Korasaun, no sira ne’ebé rekuperadu ona hamutuk 35,” Sekretáriu Rejionál Asuntu Saúde, Manuel da Costa, informa ba Agência Tatoli iha Sikluli, Suku Costa, Sub-rejiaun Pante Makasar.

Atu redús númeru kazu COVID-19 iha RAEOA, Manuel da Costa hateten, daudaun ne’e ekipa prevensaun no mitigasaun kontinua halo sensibilizasaun kona-ba impaktu COVID-19 ba komunidade sira iha area remota hodi obedese ba protokolu saúde públiku.

 “Ita propoin ona ba Governu sentrál atu halo serka sanitária ba suku balun hanesan  Suku Naimeco, Suku Costa, Sub-rejiaun Pante Makasar, Suku Bobometo, Sub-rejaiun Oésilo no fatin seluk-tan tanba kazu balu ita rejista iha sub-rejiaun Pasabe no Nitibe mak hamutuk na’in-99 ona,” Manuel da Costa hateten.

Totál pasajeiru ka abitante ne’ebé kumpre hela kuarentena obrigatóriu iha RAEOA iha segunda ne’e hamutuk 59.

Jornalista   : Abílio Elo Nini
Editór        : Francisco Simões

HAKEREK NO HATÁN

Please enter your comment!
Please enter your name here