Osan Dollar Amerikanu. Imajen/Espesiál

DILI, 16 agostu 2021 (TATOLI)- Ministériu Ensinu Superiór, Siénsia no Kultura (MESSK) liuhosi Inspetór Jerál MESSK, segunda ne’e, halo monitorizasaun ba orsamentu izensaun propinas no pulsa internet nian ba Instituisaun  Ensinu Superior haat iha Munisípiu Dili.

Notísia Relevante : PN husu loke investigasaun ba implementasaun subsídiu propinas

Inspetór Jerál Ministériu Ensinu Superiór, Siénsia no Kultura, Higino Alves hateten, monitorizasaun ne’e oinsá atu públiku mós bele hatene lala’ok implementasaun orsamentu izensaun propinas no internet nian ne’ebé transfere ona ba ensinu superiór sira.

“Ami halo monitorizasaun tanba bazeia ba diploma ministeriál 34/2021 19 maiu katak, iha artigu 05 fó kompeténsia ba komisaun monitorizasaun no fiskalizasaun ba iha izensaun propinas no mós internet ba estudante sira iha ensinu superiór públiku no privadu, ne’e mak ami ekipa la’o tuir haree lala’ok ida kona-ba prosesu implementasaun ba iha propinas no internet ne’ebé atribui ba estudante sira iha loron 15 jullu 2021,” Higino Alves, hateten ba jornalista-sira iha Universidade Nasionál Timor Lorosa’e (UNTL), Dili.

MESSK iha komisaun rua; ida kona-ba monitorizasaun no ida seluk fiskalizasaun ne’ebé daudaun ne’e ekipa monitorizasaun mak uluk atu haree  izensaun propinas no internet ba ensinu superiór-sira ne’e to’o iha ne’ebé ona no to’o fiskalizasaun mak sei haree ba dadus tanba bazeia ba diploma ministeriál ne’e fó loron 90 ba ensinu superiór sira tenke relata ona relatóriu ba MESSK ho ida ne’e mak Inspetór Jerál MESSK nian halo uluk monitorizasaun.

Estudante hosi instituisaun ensinu superiór  18 ne’ebé hatama dadus ba MESSK atu hetan propinas no internet hamutuk na’in-64.589 ho totál orsamentu ba propinas $5.000.000, ba pulsa internet nian hamutuk $2.000.000, tanba ne’e  propinas no internet nian hamutuk $7.000.000.

Maneira fahe pulsa ka internet ba kada estudante sira loloos ne’e hetan $30.00 maibé MESSK koopera ho operadór telekomunikasaun sira halo transferénsia pulsa ba estudante sira kada loron $15 halo transferénsia pulsa $5.00 to’o alvu $30.00 ne’e ramata.

Iha fatin hanesan Vise Reitór Asuntu Administrasaun Finansa no Administradór Jerál UNTL, Helio Xavier dehan, relasaun transferénsia ba propinas nian ne’ebé mai iha UNTL ne’e hahú iha loron 15 jullu 2021, hetan transferénsia hosi Ministériu Finansa orsamentu hamutuk $660.375.00, ba propinas ninian.

“Ita-nia estudante sira ne’ebé antes ne’e selu uluk ona eskola mak, foin ita-nia Governu deside atu selu estudante sira-nia propinas, mak mekanizmu ne’ebé daudaun ita halo mak atu fó fila sira-nia osan maibé tanba agora daudaun eskola reativa fali entaun osan ne’ebé Governu haruka mai ne’e eskola prepara nota (kuitansi) ida fó ba estuda sira katak sira selu de’it semestre segundu nian, maizumenus lista estudante hosi UNTL ne’ebé hetan propinas ba eskola nian hamutuk 24.000,” nia hateten.

Oráriu monitorizasaun orsamentu izensaun propinas no pulsa internet ne’ebé ohin MESSK halo ba ensinu superiór haat mak hanesan, UNTL, Universidade da Paz (UNPAZ), Universidade Orientál Timor Lorosa’e (UNITAL), no Universidade Dili (UNDIL) nune’e ensinu superiór sira seluk sei kontinua iha loron 17 agostu to’o loron 03 setembru  2021)

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here