Kazu ró Tranship II, CAC hala’o mandadu buska no apreensaun ba APORTIL
DILI, 16 agostu 2021 (TATOLI)—Komisaun Anti Korrupsun (CAC sígla portugés), hala’o mandadu buska apreensaun ba iha Autoridade Portuária Timor-Leste (APORTIL), liuhosi Diresaun Cabotage, relasiona ho prosesu aluga ró Tranship II.
CAC halo ezekusaun buska no domisíliu inklui prende sasan bazeia ba mandadu Tribunal Distritál Dili (TDD) ho númeru NUC 007/21.CAC TL, ne’ebé hala’o iha edifísiu Cabotage portu Dili, segunda tuku 9:40 otl.
Notísia relevante:Prosesu kontratu ró Tranship II, CAC aprezenta notísia krime ba MP
Antes tama ba edifísiu, Diretór Nasionál ba informasaun no seguransa hosi CAC, Euclides Madeira, esplika ba funsionáriu hotu-hotu atu tur hakmatek, hodi halo buska no funsionáriu koopera diak durante prosesu tomak.
Iha prosesu buska ne’e, ekipa investigadór-sira rekolla dokumentu ne’ebé liga ba Prosesu aprovizionamentu, tanba diresaun ne’e mak halo inspesaun ba ró no halo rekomendasaun hodi fó ba ba superiór iha Ministériu Transporte no Komunikasaun (MTK), inklui Ministru rasik hodi foti desizaun aluga ró ne’e, maibé deskonfia ró ne’e ho kondisaun la favorável, hodi halo operasaun inklui kustu kontratu selu boot tebes.
Dokumentu sira sei sai hanesan matéria hodi reforsa investigasaun tuir-mai, atu dezenvolve prova, no bele loke prosesu investigasaun tuir-mai.
Iha prosesu ne’e, akompaña mós hosi Polisia Nasionál Serbisu Investigasaun Kriminál (PNSIK), hodi fó seguransa ba CAC.
Antes ne’e, Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, hateten CAC hato’o ona autopartisipasaun rezultadu analiza kona-bá inspesaun ba ró Tranship II Gresik Indonézia, ba Ministériu Públiku (MP).
Luis Oliveira Sampaio la esplika detallu kona-bá inidísiu irregularidade ne’e, tanba nu’udár matéria investigasaun, tenke kumpre segredu justisa no labele fó-sai uluk.
Governu liu hosi MTK halo ona akordu kontratu ho kompañia Atralata Estrategi hosi Indonézia, hodi bele opera ró-ahi KMP Tranship II iha Timor-Leste, ne’ebé ró-ahi ne’e atraka iha Portu Dili iha 25 maiu 2021.
Kontratu ho kompañia estranjeiru ne’e, ba kada fulan $220.000, ho ninia kapasidade tula pasajeiru hamuutuk na’in 300 inklui sasán ho kapasidade tonelada 1.000-resin.
Tuir planu, ró-ahi ne’e temporariamente sei halo operasaun entre Dili-Óe-cusse no Dili-Ataúro, hodi hein ró-ahi Belin Nakroma no Sukses ne’ebé iha prosesu manutensaun.
Notísia relevante:MP analiza hela kazu ró Tranship II
Jornalista: Nelson de Sousa
Editór: Cipriano Colo
