Edifísiu EDTL,E.P munisípiu Bobonaro (16/08). Imajen Tatoli/Sérgio da Cruz.

BOBONARO, 16 agostu 2021 (TATOLI)—Eletrisidadade Timor-Leste, Empreza Públika (EDTL,E.P), munisípiu Bobonaro nota katak, maioria insitituisaun Estadu iha munisípiu ne’e, kada fulan la selu eletrisidade.

“Durante ne’e ami nota instituisaun Estadu barak mak iha ne’e la selu no nunka kontribui ba reseita Estadu,” Supervizór EDTL,E.P Bobonaro, Mário de Jesus Soares, hateten ba jornalista Agência Tatoli, iha nia kna’ar-fatin, segunda ne’e.

Notísia relevante:Janeiru-juñu, DMCSRN Bobonaro rekolla $2.150

Durante ne’e, EDTL,E.P Bobonaro rejista de’it maka Osiptál Referénsia Maliana (HRM sígla portugé), mak selu eletrisidade kada fulan ho valór rihun $20-resin, tanba konsideradu halo ligasaun transformadór espesiál to’o ohin loron.

“Lei hateten katak, kliente-sira tantu Governu, Komersiál no kliente babain, binhira la halo pagamentu eletrisidade durante fulan tolu, EDTL,E.P sei ba to’o fatin hodi dezliga provizóriu, no sei aplika multa iha banku mak bele liga fila-fali,” nia esplika.

Bazeia ba dekretu lei númeru 33/2016/artigu 13, kliente ne’ebé la selu eletrisidade durante fulan tolu, sei aplika multa tuir kategoria, kliente babain ka doméstika sei selu $100 to’o $2.000, Komersiál hosi $2000 to’o $15.000 inklui kliente sosiál ka Governu.

Iha fulan kotuk, EDTL,E.P Bobonaro apela ona ba dirinjente instituisaun Estadu iha Bobonaro, maibé to’o agora sei kontinua la selu eletrisidade.

Tempu badak, tékniku-sira sei dezliga provizóriu ligasaun eletrisidade ba instituisaun Estadu-sira ne’ebé kontra lei, nune’e bele aumenta taxa ba kofre Estadu.

Iha sorin seluk, Diretór Nasionál Transporte Terrestre (DNTT), munisípiu Bobonaro, José Paulo Henriques Baptista, hateten durante ne’e seidauk hetan informasaun no karta ofisiál hosi EDTL,E.P atu bele selu taxa kada fulan.

“Ami prontu koopera ho EDTL,E.P, importante maka tenke haruka karta ofisiál ida mai ami, atu nune’e ba oin ami hato’o ba diresaun jerál,” nia hateten.

Iha fulan kotuk, EDTL,E.P forma ekipa konjunta ida hodi halo pasa revista tama sai uma, ba kliente doméstika no komersiál, maibé la detekta ligasaun ilegál, tanba ne’e iha situasaun Estadu emerjensia no pandemia COVID-19 mós EDTL,E.P kontinua kontribui reseita ba Estadu.

Iha fulan maiu, EDTL,E.P Bobonaro hatama reseita hamutuk $31.933,44 hosi sira’a halo ligasaun foun no ligasaun konvensionál no iha juñu $34.441,90 no fulan jullu ne’e provizóriu $1.529,10.

Ikus liu, husu ba populasaun Bobonaro, bainhira atu halo ligasaun foun tenke mai rejistu iha EDTL,E.P, nune’e tékniku-sira bele fasilita, hodi evita inséndiu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here