Edifísiu Diresaun Munisipál Konservatóriu Serbisu Rejistu Notariadu (DMCSRN sígla portugés), munisípiu Bobonaro (21/07/21). Imajen Tatoli/Sérgio da Cruz.

BOBONARO, 21 jullu 2021 (TATOLI)—Hahú hosi janeiru to’o juñu tinan ne’e, Diresaun Munisipál Konservatóriu Serbisu Rejistu Notariadu (DMCSRN sígla portugés), munisípiu Bobonaro, hatama reseita  ba kofre Estadu hamutuk $2.150.

“Iha trimestre dahuluk, ita konsege halibur de’it reseita oitoan tanba ema mai trata pasaporte menus liu, kauza hosi pandemia COVID-19,” Diretór DNRNCR munisípiu Bobonaro, João Maupelu da Costa, informa ba jronalista Agência Tatoli, iha kna’ar fatin, Holsa, Maliana, kuarta ne’e.

Notísia relevante:PNDS implementa ona projetu 180 iha Bobonaro

Montante ne’e rekolla hosi atendimentu emisaun pasaporte ba ema na’in 38, hosi númeru ne’e maioria trata pasaporte komún, enkuantu durante ne’e DNRNCR Bobonaro la rejista emisaun pasaporte serbisu no diplomátiku tanba impaktu hosi COVID-19.

Bazeia ba orientasaun hosi nasionál, durante serka sanitária iha munisípiu Bobonaro, funsionáriu DMCSRN la tama serbisu no halo de’it atendimentu ba ema ne’ebé trata pasaporte urjente.

Tanba ne’e, diretór ne’e rekoñese iha trimestre dahuluk ne’e reseita ba kofre Estadu menus, kompara ho tinan kotuk.

Iha Tinan kotuk, DMCSRN munisípiu Bobonaro, kontribui reseita ba kofre Estadu hamutuk $26.150. rekolla hosi sidadaun na’in 476, ne’ebé trata pasaporte komún, pasaporte serbisu no diplomátiku.

Tuir rekerimentu, prosesu tratamentu pasporte komún ho durasaun tempu loron 10, ho valór $50, pasaporte serbisu ho nia-durasaun tempu loron tolu folin $75 no pasaporte dilpomátiku $100 loron ida foti kedan.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here