Ministru Defeza (MD), Filomeno da Paixão de Jesus ho Embaixadór Austrália iha TL, Petter Roberts, asina akordu ba konstrusaun portu Navál Hera, sesta (13/08/21). Imajen Média F-FDTL.

DILI, 13 agostu 2021 (TATOLI)—Governu Timor-Leste (TL) liuhosi Ministru Defeza (MD), Filomeno da Paixão de Jesus ho Embaixadór Austrália iha TL, Petter Roberts, asina akordu ba konstrusaun portu Navál Hera.

Liuhosi akordu ne’e, Governu Austrália hakarak ajuda TL halo konstrusaun ba portu ne’e to’o finaliza, hodi prepara ba ró rua ne’ebé Austrália rasik sei oferese ne’ebé  tuir planu sei to’o iha TL iha 2023.

Notísia relevante:Governu planeia konstrui portu navál Hera iha tinan oin

“Austrália sei fasilita ekipa tékniku no materiál atu mai TL hodi bele hahú konstrusaun,” Filomeno da Paixão de Jesus hateten ba jornalista-sira hafoin selebra akordu iha kuartél jerál F-FDTL, Fatuhada, sesta ne’e.

Kona-bá orsamentu  hira mak Austrália  aloka  ba apoiu konstrusaun ne’e la fó-sai iha akordu ne’e, maibé kompromete sei finaliza kontrusaun iha tempu badak.

Tanba ne’e, Governu TL agradese ba Austrália ne’ebé la’ós foin fó apoiu, maibé sempre ajuda TL iha kualkér situasaun, liuliu iha área defeza.

Nune’e mós Petter Roberts, hateten Austrália fó apoiu tanba nasaun rua depedente-malu iha área fronteira sira no presiza serbisu hamutuk atu asegura tasi.

Tanba ne’e, iha 2017 Austrália ho TL konkorda sei fornese ró patrullamentu rua ba TL no sei haruka mai TL iha 2023, nune’e pakote ida ho infraestrutura.

Iha 28 jullu, Governu liuhosi reuniaun Konsellu Ministru (KM)  fó podér tomak ba Ministru Defeza (MD), Filomeno da Paixão de Jesus, hodi asina  akordu ho Departamentu Defeza Austrália nian (DDA) ba atividade insfraestrutura no instalasaun-sira iha portu Hera.

Tuir kálkulu, konstrusaun portu navál Hera presiza orsamentu millaun $20-resin, maibé Governu rua sei aloka  orsamentu pur faze to’o konstrusaun remata.

VII Governu konstituisionál iha polítika no planu ba konstrusaun portu no sosa ró atu bele halo operasaun iha tasi mane, ne’ebé foku ba patrullamentu no lojístika bainhira halo produsaun mina iha tasi Timór, liuliu tau-matan ba polusaun, inséndiu no ema ilegál ne’ebé tama no sai tasi laran.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here