Ministru Defeza, Filomeno da Paixão de Jesus. Imajen TATOLI/Egas Cristóvão

DILI, 31 maiu 2021 (TATOLI)-Governu liuhosi Ministériu Defeza (MD) iha ona planu atu propoin orsamentu balun iha Orsamentu Jerál Estadu (OJE) 2022 atu halo konstrusaun portu iha Hera, munisípiu Dili, atu fasilita FALINTIL-Forsa Defeza Timor-Leste (F-FDTL) hosi Unidade Komponente Navál halo serbisu ho di’ak.

“Ita sei hatama proposta hodi propoin orsamenentu iha tinan 2022 atubele hahú konstrusaun ba portu Navál Hera atu fasilita Unidade Komponente Navál,” Minsitru Defeza, Filomeno da Paixão de Jesus, hateten iha edifisiu Ministériu Finansa, Aitarak-laran, segunda ne’e.

Notísia relevante: Governu Sei Aprova Kriasaun Autoridade Marítima Nasionál

Tuir governante ne’e, daudaun ne’e, Governu Timor-Leste no Austrália halo hela diskusaun atu simu apoia ró rua ho medida metru 40  ba Timor-Leste.

Governu Austrália mós hakarak apoia konstrui portu ida iha Hera, nunee ró rua ne’ebé oferese ona bele atraka iha área ne’e no Timor-Leste mós hakarak konstrui portu ida fali, maibé sei propin iha orsamentu.

“Kona-ba konstrusaun portu navál, ita bele implementa iha tinan oin, tanba orsamentu mak seidauk iha detallu, maibé sira (Austrália) iha kompromisu atu apoia halo portu foun,” nia akresenta.

Tuir kálkulu, presiza orsamentu millaun $20-resin ba konstrui portu naval Hera, maibé Governu nasaun rua sei aloka orsamentu pur faze to’o ratama.

VIII Governu Konstitusionál iha polítika no planu ba konstrusaun portu no sosa ró atubele halo operasaun iha tasi mane, ne’ebé  foku ba patrullamentu no lojíztika bainhira halo produsaun mina iha tasi Timór, liuliu tau-matan ba polusaun, inséndiu no ema ilegál ne’ebé tama no sai tasi laran.

Nune’e, Governu hahú kria Autoridade Marítima ne’ebé sei akumula hotu Unidade Komponente Navál hosi F-FDTL inklui Unidade Polísia Marítima no Polísia Nasionál Timor Leste (PNTL) atu hamutuk asegura riku-soin iha tasi laran.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here