Postu UPF iha liña fronteira Eufauk, Postu Administrativu Balibo, Munisipiu Bobonaro. Imajen Tatoli/Eugénio Pereira.

BOBONARO, 13 agostu 2021 (TATOLI)—Polísia Nasionál Timor-Leste (PNTL) liuhosi Unidade Batalliaun Orden Públika (BOP)  hamutuk ho Komandu  kompañia Delta Maliana no kompañia Operasaun Espesiál (COE), ne’e kaptura tan sidadaun mane na’in-rua ne’ebé hakat ilegál hosi Atambua mai Timor-Leste (TL), iha sesta ne’e.

“Iha tuku 19:00 otl, membru UEP hosi BOP no COE halo vizilánsia iha mota laran Malibaka, suku Tapo-Memu konsega kaptura tan sidadaun na’in-rua iha área fronteira,” Komandante UEP, Superintendente Xefe, Orlando Gomes, hateten liuhosi komunikadu.

Notísia relevante:Timor-Leste koordena ona ho Governu Indonézia kontrola pasajen ilegál

Sidadaun na’in-rua ne’e orijen hosi munisipiu Covalima, ida ho inisiál MPM hosi postu administrativu Zumalai no HFB hosi Suai Villa.

Sidadun na’in-rua ne’e, hakat klandestinamente ba Atambua Nusa Tenggara Timur (NTT) fulan tolu ona, no tenta hakat ilegál fali mai Timor-Leste, maibé polísia halo kedan kapturasaun.

Membru sira halo ona identifikasaun, bainhira konklui sei entrega ba Komandu PNTL munisípiu Bobonaro, hodi halo prosesu investigasaun tuir área jurídiku munisípiu Bobonaro.

Alende ne’e, iha 10 agostu, UPF kaptura membru GAM na’in-ha’at tenta hakat ilegál iha área Lepo Aidalegu, postu administrativu Zumalai, munisipiu Covalima.

Iha 11 agostu polísia kaptura tan fasilitadór ilegál na’in-haat iha área Alto Lebos, postu administrativu Lolotoe, munisipiu Bobonaro.

Euclides husu tama hosi dalan legál

Kona-bá ne’e, Komandante Unidade Patrulamentu Fronteira (UPF), Superintendente Xefe, Euclides Belo, husu ba Timoroan ne’ebé tama ilegál iha Atambua, koopera ho autoridade seguransa fila-mai tuir dalan legál.

Maski seidaun iha númeru serteza, sidadaun hira mak sei iha hela Atambua, maibé nafatin husu atu aprezenta an ba autoridade seguransa Indonézia, nune’e bele halo deportasaun tuir dalan legál.

Nune’e mós husu ba autoridade lokál no komunidade iha fronteira atu bainhira deteta joven ne’ebé tama ilegalmente hosi Atambua mai Timor-Leste tenke informa kedan ba autoridade seguransa,nune’e bele halo kapturasaun hodi submete ba kuarentena.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here