Ministru Prezidnsia Konsellu Ministru, Fidelis Manuel Leite Magalhães. Imajen TATOLI/Francisco Sony

DILI, 11 agostu 2021 (TATOLI)—Timor-Leste liuhosi Ministériu Negósiu Estranjeiru no Kooperasaun (MNEK) koordena ona ho Governu Indonézia liuhosi Embaixada iha Dili hodi serbisu hamutuk kontrola pasajen ilegál iha pontu entrada sira.

“Preokupasaun kona-ba fronteira, medida hirak ne’ebé hato’o ona ida-ne’e preokupasaun internasionál hosi Estadu rua. Tanba ne’e parte ita-nia liuhosi Ministériu Negósiu Estranjeiru no Kooperasaun (MNEK) kontaktu ba diplomata Indonéziu liuhosi sira-nia Embaixada hodi hato’o preokupasaun ne’e ba Indonézia,” Ministru Prezidénsia Konsellu Ministru, Fidelis Manuel Leite Magalhães, hateten, iha Palásiu Governu, kuarta ne’e.

Notísia relevante: Autoridade seguransa Indonézia deporta Timoroan 113 mai TL

Daudaun ne’e, Timor-Leste luta maka’as kombate surtu COVID-19, liliu variante delta ne’ebé hamate ona ema barak iha nasaun barak ho nia nível kontájiu maka’as liu, tanba ne’e maka ho kooperasaun sira hosi autoridade seguransa rai rua bele evita transmisaun vírus ne’e.

“Medida atuasaun rai-laran no parte Indonézia, espera bele apoia kontrola liután situasaun no prevene sidadaun liu pasajen ilegál no lori vírus tama no posível iha risku lori variante delta. Tanba ne’e parte rua serbisu hamutuk no Vise-Ministru Interiór no Ministru Defeza antes ne’e halo vizita ba fronteira sira,” nia akresenta.

Kona-ba medida atu reforsa kapasidade interna, tantu iha kontestu defeza no seguransa, Governu halo hela diskusaun atubele hola medida.

Portavóz Governu ne’e mós husu ba populasaun sira ne’ebé hela iha fronteira atu koopera ho forsa seguransa.

“Ami-sira hosi fronteira hatene katak tama-sai fronteira ne’e la’ós defisil no tanba ita-nia relasaun iha ne’ebá dalabarak relasaun família ho mota sorin mai iha mota ita-nia, entaun fronteira ne’e iha ku’ak barak. Ho ida-ne’e atu dehan katak sein kooperasaun, ita-nia lia na’in, autoridade lokál no komunidade rasik imposível atu kontrola di’ak liután pasajen ilegál sai no tama mai Timor-Leste,” Fidelis subliña.

Iha segunda (09/08) kalan autoridade seguransa Atambua kaptura timor-oan na’in-113 ne’ebé ultrapasa fronteira ilegalmente.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here