DILI, 13 agostu 2021 (TATOLI)—Primeiru Ministru (PM), Taur Matan Ruak, hala’o vizita hodi haree progresu ba konstrusaun edifísiu foun Tribunál Distritál Dili (TDD), iha Caicoli, Dili, sesta ne’e.
“Prezidente Tribunál Rekursu mak konvida atu mai vizita fatin konstrusaun ne’ebé iha tinan kotuk lansa. Kontente loos haree serbisu kontratór no konsultan ne’ebé ho kualidade di’ak,” PM Taur Matan Ruak, hateten ba jornalista-sira.
Notísia relevante:Juíz Administradór Dili Husu Kompañia Aselera Prosesu Konstrusaun ba Edifísiu TDD
Xefe Governu espera, tinan oin bele remata konstrusaun, tanba hanesan Estadu direitu demokrátiku nia pilár boot ida mak setór justisa.
Konstrusaun ba edifísiu foun TDD ne’e lansa fatuk-inan iha 25 novembru 2020, ne’ebé hetan supervizaun konsultóriu hosi kompañia Dacrea In Association with AEC no kontratór hosi kompañia Xina Shadong International Economic and Technical Cooperation Group.R.P. ho valór projetu $10.990.769,35 ne’ebé obra fíziku ba konstrusan atinji ona 27%.
Tuir akordu kontratu entre obra na’in, Tribunál Rekursu ho kompañia ezekutór katak, durasaun obra ne’e sei termina iha tinan rua nia laran, hahú 2020 no sei entrega ba Estadu iha 2021.
Edifisíu TDD foun ne’e konstrui ho medida andár-rua sei kompleta sala audiénsia julgamentu, sala ba serbisu ofisiál justisa, juis, prokuradór, defensór, advogadu no ba sidadaun-sira ne’ebé asesu ba justisa ho espasu dignu.
Jornalista: Nelson de Sousa
Editór: Cipriano Colo
