Ministra Saúde (MS), Odete Maria Freitas Belo, observa direta progresu konstrusaun armazen Serbisu Autónomu Medikamentu no Ekipamentu Saúde (SAMES) iha postu adminiatrativu Maliana, munisipiu Bobonaro, sesta (06/08/21). Imajen Tatoli/Sérgio da Cruz.

BOBONARO, 06 agostu 2021 (TATOLI)—Ministra Saúde (MS), Odete Maria Freitas Belo, observa direta progresu konstrusaun  armazen Serbisu Autónomu Medikamentu no Ekipamentu Saúde (SAMES) iha postu adminiatrativu Maliana, munisipiu Bobonaro, sesta ne’e.

“Aproveita vizita armazen SAMES, fatin ICU ba COVID-19 ho izolamentu, atu hare de’it ninia atinjimentu konstrusaun,” Ministra hateten ba jornalista Agência Tatoli, iha armazen SAMES, suku Lahomea.

Notísia relevante:Populasaun Bobonaro 46.179 seidauk simu vasina

Durante vizita, Odete Maria Freitas Belo observa deteta atinjimentu konstrusaun tarde tanba hahú iha 2019 to’o ohin loron kompañia Sembuhan Unipesoal Lda, seidauk finaliza.

Enjeñeiru sembuhan Unipesoal Lda, Rogério dos Santos, esplika razaun konstrusaun ne’e, atrazu tanba hahú konstrusaun mosu disputa rai ho komunidade nune’e demora tan tempu naruk.

Alende ne’e mosu tan pandemia COVID-19 Governu implementa Estadu emerjénsia no serka sanitária serbisu hotu-hotu paradu.

Iha situasaun Estadu emerjénsia, kompañia ne’e mós hasoru difikuldade kona-bá fornesimentu materiál, maibé sira promete iha fulan oin konstrusaun ne’e bele finaliza tanba atinjimentu to’o ona 85%.

Laboratóriu COVID-19 ninia progresu atinjimentu to’o ona 76% no izolamentu iha Ospitál Referál Maliana mós atinje ona 71%.

Kona-bá sala ICU Ospitál Referál Maliana, kompañia finaliza ona obra no tuir planu sei entrega ba Governu iha semana oin.

Aramzen SAMES ho medida 17×30, konstrui hosi Kompañia sembuhan Unipesoal Lda, ho totál orsamentu $220.190,97, Izolamentu COVID-19 iha Ospitál Referál Maliana ho medida 32,40×14,40  konstrui hosi kompañia lokál Remistade Unipesoal Lda, ho totál orsamentu $236.772,06 no Laboratóriu COVID-19 ho medida 8×10 konstrui hosi kompañia lokál K-6 unipesoal Lda ho totál orsamentu hamutuk $78.326,15.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here