Membru Governu relevante iha área ekonomia no pesoa eminente Timor-Leste, iha ámbitu partisipa iha reuniaun Grupu Traballu daruak via virtuál, iha salaun enkontru MNEK. Imajen/MKAE

DILI, 12 agostu 2021 (TATOLI)-Adjuntu Diretór Jerál Organizasaun Mundiál Komérsiu (OMK) iha Jenebra, Xiangchen Zhang, hateten, maski Timor-Leste tama kategoria país menus dezenvolvidu (PMDs) no hasoru dezafiu tanba pandemia, maibé prosesu adezaun ba organizasaun mundiál ne’e hatudu rezultadu di’ak.

“Timor-Leste nu’udar pais PMDs foun iha prosesu adezaun ne’e. Prosesu ne’e hahú iha tinan 2016 no agora hatudu velosidade lais. Ha’u-nia rekomendasaun nu’udar eis negosiadór adezaun no eis-prezidente Grupu Traballu Adezaun PMDs, husu kontinua mantein esforsu ho serbisu  di’ak atu adere ba OMK,” Adjuntu Diretór hateten liuhosi nota ne’ebé Agência TATOLI asesu, kinta ne’e.

Notísia relevante: Adezaun ba OMK, MKAE prontu hadi’a lejizlasaun fasilita investimentu

Timor-Leste partisipa reuniaun Grupu Traballu daruak (Second Working Party Meeeting) ho meiu virtuál ne’ebé prezide hosi Embaixadór Rui Macieira hosi Portugal, ne’ebé durante reuniaun membru hirak ne’ebé partisipa halo revizaun negosiasaun bilaterál asesu merkadu no kontinua analiza rejime komérsiu exsterna Timor-Leste bazeia ba dokumentu ne’ebé hato’o hosi Grupu Traballu, ne’ebé halo analiza kestaun lejislativa hodi  konsidera iha prosesu  adezaun.

Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.

Nune’e, Diretór Adjuntu ne’e afirma, Sekretariadu OMK prontu koordena ho asisténsia téknika hosi PMDs hodi bele fó resposta iha tempu badak.

Eis Prezidente Repúblika, Jose Ramos Horta, hateten, adezaun OMK nu’udar parte integrante hosi Estadu Timor-Leste nian kompromisu bazeia ba orden no regra.

“Timor-Leste totalmente empeña hodi kumpre prinsípiu, objetivu no regraa hosi OMK atu adere ba OMK,” nia akresenta.

Nune’e, Ministru Koordenador Asuntu Ekonómiku no Xefe Negosiadór Adezaun Timor-Leste ba OMK, Joaquim Amaral, komprometidu kontinua atualiza serbisu hirak ne’ebé halo ona iha reuniaun dahuluk Grupu Traballu ne’ebé realiza iha outubru 2020.

Timor-Leste kontinua hakat ba oin kona-ba adezaun ne’e, hodi dezenvolve hanoin hirak ne’ebé hato’o hosi país membru sira, inklui oferta asesu ba merkadu kona-ba bens no serbisu ne’ebé  distribui ona ba membru Grupu  Traballu sira iha maiu no juñu tinan ne’e.

“Ha’u mós hakarak  informa ba Grupu Traballu sira, Timor-Leste hahú halo konsultasaun bilaterál kona-ba asesu ba merkadu ho membru interesadu sira bazeia ba oferta ne’ebé mak hato’o mai ami,” Xefe Negosiadór Adezaun Timor Leste ba OMK dehan.

Nia konsidera, partisipasaun Timor-Leste iha reuniaun ne’e atu hatudu vontade forte sai parte OMK ho rápida, posível no responsabilidade, nune’e sei define termu kona-ba adezaun hodi halo asaun polítika nesesáriu.

Nune’e mós, Vise-Ministru Komérsiu no Indústria, Domingos Lopes Antunes, afirma Timor-Leste kontinua aselera partisipasaun iha prosesu adezaun no kontinua buka asisténsia nesesária hosi parseiru sira.

“Ha’u fiar ami sei tuir roteiru adezaun ne’ebé hato’o hosi Sekretariadu OMK, ne’ebé haktuir hosi planu ne’ebé garante ami-nia vontade tomak iha tinan oin mai, maski ho dezafiu globál hosi pandémia COVID-19 ne’e,” nia tenik.

Reuniaun Grupu Traballu daruak ne’ebé fasilita hosi Sekretariadu Adezaun Timor Leste ba OMK hosi MKAE, hala’o iha salaun enkontru Ministériu Negósiu Estranjeiru no Kooperasaun no hetan partisipasaun másimu hosi membru Governu sira hanesan Ministru Koordenadór Asuntu Ekonómiku, Joaquim Amaral, Ministru Finansa, Rui Gomes, Ministru Turizmu, Komérsiu no Indústria, José Lucas do Carmo da Silva, Vise-Ministru Komérsiu no Indústria Domingos Lopes Antunes no Sekretáriu Estadu Formasaun Profisionál no Empregu, Alarico do Rosário.

Partisipa mós hosi pesoal eminente balun hanesan eis Prezidente Republika Timor Leste, Jose Ramos Horta no eis Ministru Koordenadór Asuntu Ekonómiku, Estanislau da Conceição Aleixo Maria da Silva.

Jornalista : Florêncio Miranda Ximenes

Editora     : Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here