Primeriu-Ministru, Taur Matan Ruak, konvoka enkontru ho Ministru Koordenadór Asuntu Ekonómiku (MKAE), Joaquim Amaral no ekipa, iha Rezidénsia Farol, sesta (23/07). Imajen TATOLI/Francisco Sony

DILI, 23 jullu 2021 (TATOLI)Ministru Koordenadór Asuntu Ekonómiku (MKAE), Joaquim Amaral, hateten, bainhira Timor-Leste adere ona ba Organizasaun Mundiál Komérsiu (OMK), bele loke liután oportunidade investimentu iha rai-laran, tanba ne’e atu atrai investidór estranjeiru, presiza seguransa iha aspetu lejizlasaun ne’ebé proteje direitu no ambiente negósiu ne’ebé di’ak no saudável.

“Ita prontu hadi’a lejislasaun sira atu hatudu sinál ba rai-li’ur katak Timor-Leste hahú loke dalan ba investidór atu mai investe iha rai ne’e ho seguru,” Ministru Joaquim informa, hafoin hasoru malu ho Primeiru-Ministru (PM), Taur Matan Ruak, iha Rezidénsia Farol, sesta ne’e.

Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.

Aleinde ne’e, Governu estabelese grupu traballu ba OMK hodi halo preparasaun, prienxe rekezitu no tuir enkontru koordenasaun ho Estadu membru.

Tanba ne’e, durante ekontru ho PM, Ministru Joaquim atualiza preparasaun partisipa enkontru grupu traballu ba OMK ne’ebé sei realiza iha fulan ne’e.

“Ha’u hamutuk ho ekipa traballu aprezenta ba Primeiru-Ministru kona-ba Timor-Leste nia preparasaun atubele hola parte iha enkontru faze daruak grupu traballu entre país membru sira ne’ebé sei realiza iha loron  29 jullu,” nia akresenta.

Notísia relevante: MKAE otimista bele sai membru OMK tinan ne’e

Tuir ajenda, enkontru via virtuál, delegasaun hosi Timor-Leste sei realiza iha salaun Ministériu Negósiu Estranjeiru no Kooperasaun (MNEK), iha loron 29 jullu, tuku 16:00 oras Timor-Leste.

Ekipa traballu hosi Timor-Leste sei aprezenta produtu sira ne’ebé hatama iha dokumentu factual summary ne’ebé Sekretáriu OMK prepara no sirkula ona ba Estadu membru sira.

Timor-Leste nia partisipasaun  iha  enkontru ne’e atu Estadu membru sira  bainhira iha interese ba servisu no produtu, bele atu husu pergunta no delegasaun  prontu hataan.

“Ita iha produtu no servisu iha rai-laran ne’ebé potensiál tebes atu tama iha merkadu internasionál no bele atrai investidór sira investe hanesan setór peska, petróleu, minerál, kafé no seluk tan,” Ministru subliña.

Tanba ne’e, investidór sira bainhira atu mai investe, Governu presiza prepara lista produtu no servisu ne’ebé sei oferese ba merkadu internasionál.

“Ita sai membru OMK iha vantajen ba ita-nia ekonomia no investimentu, maibé  presiza kumpre rekezitu reforma internál sira ne’ebé bele fó seguransa ba ambiente negósiu ne’ebé saudavél,” nia tenik.

Adezaun ne’e mós ho hanoin ida katak Governu halo parseria ho setór privadu nasionál no internasionál atu loke kampu traballu.

OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.

 Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here