Prezidente Autoridade RAEOA, Arsénio Paixão Bano hala’o vizita ba observa obra perfurasaun bee-moos iha Sonamnasi, suku Cunha, sub-rejiaun Pante Makasar , kinta (12/08). Imajen Tatoli/Abilio Elo Nini

OÉ-CUSSE, 12 agostu 2021 (TATOLI)- Projetu perfurasaun sistema bee-moos ne’ebé autoridade RAEOA konstrui iha  aldeia Sonamnasi, suku Cunha, sub-rejiaun Pante Makasar nia progresu atinje 85%.

Notísia Relevante : Konstrusaun perfurasaun bee-moos iha Sonamnasi atinje ona 57%

Prezidente Autoridade RAEOA, Arsénio Paixão Bano hamutuk ho Diresaun Rejionál Infraestrutura (RDI) liuhosi Departamentu Servisu Agua Saneamentu (DSAS),  kinta ne’e, hala’o vizita ba observa obra ne’e no husu ba empreza atu bele konklui ona.

“Autoridade espera empreza bele finaliza ona iha tempu badak atu bele entrega ona ba komunidade sira iha aldeia Sonamnasi, tanba aldeia ida ne’e susar tebes atu asesu bee-moos,” Arsénio Paixão Bano hateten.

Nunmabun Unipesoál, Lda nu’udar empreza exekutór obra perfurasaun bee-moos liuhosi nia  diretór Acalu Nunes, informa katak obra perfurasaun sistema bee-moos ne’e nia progresu fíziku finaliza ona, hanesan tanke bee-moos konstrui ona ho nia medida metru 5×10 ho distánsia metru 52.

Nia promete sei finaliza iha tempu badak, tanba daudaun ne’e falta de’it nia pipa polypoid atu dada hosi bee-matan ba tanke bee nian.

Rezultadu perfurasaun sistema bee-moos ne’e hatudu katak nia volume bee 100 mil litru, sei fó benefisia ba komunidade iha aldeia Sonamnasi hamutuk uma-kain 182 ho totál populasaun 850. Obra ne’e rasik nia kustu $156,325,73 ho durasaun servisu fulan neen.

Jornalista   : Abilio Elo Nini
Editór        : Francisco Simões

HAKEREK NO HATÁN

Please enter your comment!
Please enter your name here