Autoridade RAEOA, Arsénio Paixão Bano, hala’o fiskalizasaun ba konstrusaun perfurasaun sistema bee-moos iha aldeia Sonamnasi. Imajen Tatoli/Abilio Elo Nini.

OÉ-CUSSE, 05 jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), segunda ne’e hala’o fiskalizasaun ba konstrusaun perfurasaun sistema bee-moos iha aldeia Sonamnasi ne’ebé ninia konstrusaun fiziku atinje ona 57%.

Prezidente Autoridade (PA) Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hateten hosi rezultadu perfurasaun sistema bee-moos ne’e hatudu katak iha volume bee 100 mil litru ne’ebé sei fornese ba uma kain 182 ho totál populasaun hamutuk 800-resin.

Notísia Relevante: Arsenio Bano: “Ha’u-nia prioridade hakarak rezolve problema bee-moos iha Oé-Cusse”

“Ha’u kontente haree kualidade bee-moos ne’e, bele fornese ba populasaun 800-resin iha Sonamnasi. Autoridade nia planu primeiru atu apoiu komunidade mak bee-moos ne’e. Ita sei rezolve faze pur faze. Ohin ita iha Sonamnasi, fatin seluk kontrusaun perfurasaun bee-moos la’o hela. Ita tenke rezolve problema bee-moos iha Oé-Cusse,” Arsénio Paixão Bano hateten iha atividade hala’o fiskalizasaun hamutuk ho lider komunitária sira iha aldeia Sonamnasi, suku Cunha, sub-rejiaun Pante Makasar.

Nia apela ba komunidade sira atu kuidadu sistema bee-moos ne’e, nune’e labele hetan estragu no uza didi’ak tanba perfurasaun sistema bee-moos ne’e atu tulun komunidade iha Oé-Cusse bele asesu bee-moos ho fasil.

“Ha’u husu ba empreza ne’ebé kaer konstrusaun perfurasaun sistema bee-moos ne’e atu finaliza lalais obra ne’e, nune’e bele dada no distribui ona bee ba komunidade sira iha bairru laran atu uza ba hemu, fase roupa, inklui uza mós bele kuda modo no seluk tán,” nia dehan.

Entretantu Diretór empreza Nun Mabun Unipesoál, Asalu Nunes, hateten servisu fiziku finaliza ona no agora falta ekipamentu instalasaun ho bomba bee nian, nune’e bele halo ona kanalizasaun ba torneira lima (5) iha aldeia Sonamnasi.

Autoridade RAEOA, Arsénio Paixão Bano, hala’o fiskalizasaun ba konstrusaun perfurasaun sistema bee-moos iha aldeia Sonamnasi. Imajen Tatoli/Abilio Elo Nini.

“Konstrusaun ba tanke bee nian finaliza ona ho nia medida metru 5×10. Agora falta instalasaun atu dada ba komunidade sira iha bairru no mós sei hein hela nia bomba, sei iha hela Indonézia. Semana oin, bomba ne’e tama ona, nune’e bele halo ona kanalizasaun tanba iha aldeia Sonamnasi ami halo ona torneira hamutuk lima (5) atu komunidade bele uza no asesu,” Asalu Nunes hateten.

Iha fatin hanesan, Xefe suku Cunha, Domingos Seco Caunan, hato’o agradese ba autoridade RAEOA tanba durante tinan barak populasaun sira konsumu de’it bee-mota no maiória uza bee-posu maibé ho perfurasaun bee-moos ne’e, populasaun sira bele asesu ona bee-moos ho fasil.

“Ha’u lori ha’u-nia povu nia naran hato’o agradesimentu ba Governu tanba liuhosi autoridade RAEOA tulun ami, mai konstrui perfurasaun sistema bee-moos iha ha’u nia aldeia Sonamnasi. Tanba aldeia ne’e, tinan ba tinan uza de’it bee-posu maibé tempu bailoron ne’e bee maran, entaun iha ne’e ami konsumu de’it bee-mota ba han-hemu no fase roupa,” nia dehan.

Entretantu kontrusaun perfurasaun sistema bee-moos ne’e konstrui hosi empreza lokál Nun Mabun Unipesoal, ho kustu $156,325.73, durasaun servisu fulan (4) maibé tanba ekipamentu atraza entaun estende-tan ba fulan haat (4) ba faze finalizasaun.

Notísia Relevante: PA RAEOA-ZEESM TL halo vizita traballu ba perfurasaun bee-moos iha Suni-Ufe

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here