Labarik sira halimar no exersisiu hela iha jardim kolmera neebe governu prepara hela ekipamentus ba exersisu nian.Imajen Tatoli/Antonio Goncalves.

DILI, 05 agostu 2021 (TATOLI) — Parlamentu Nasionál liuhosi Komisaun F ne’ebé trata asuntu Saúde, Seguransa Sosiál no Igualdade Jéneru, konkorda ho paresér hosi sosiedade sivíl sira hodi halo mudansa ba projetu-lei ne’e.

“La’ós de’it títulu mak atu halo mudansa, maibé definisaun projetu-lei ne’e tenke define labarik, joven no ba família, aleinde títulu ita haree ba ladún kondisiona ita-nia situasaun Timor-Leste ninian,” Prezidente Komisaun F, Deputadu Noé da Silva Ximenes ‘Buka-Tuir’, ba jornalista sira iha resintu uma fukun, kinta ne’e.

Deputadu Bankada Partidu Libertasaun Populár ne’e dehan, tenke engloba ema hotu-hotu inklui paresér hosi Programa Monitorizasaun Sistema Judisiál (JSMP-sigla ingles) nian hodi halo ajustamentu iha projetu-lei ne’e.

“Komunidade sira-ne’ebé maka fó sira-nia opiniaun ita tenke konsidera atubele tau iha-ne’ebá, nune’e ema hotu-hotu simu prezensa lei ne’e iha sosiadade (iha implementasaun),” nia katak.

Prezidente Komisaun F ne’e fó-sai katak títulu ideal liu sei iha prosesu diskusaun maibé iha alternativu tolu hanesan “lei protesaun ba labarik no joven sira ne’e la tau iha risku”. Ida fali bele mantein ho situasaun ida-ne’e hodi indika ba labarik sira ho joven sira-ne’ebé maka iha perigu. Ida seluk bele dehan lei ba minoridade.

“Alternativu tolu ne’e depende ba diskusaun, maibé hanesan Prezidente Komisaun F, ita labele desidi mesak, tanba Parlamentu Nasionál ne’e órgaun kolejiál ida-ne’ebé ninia desizaun tenke engloba ema hotu ninia desizaun,” nia katak.

Nia fó-sai katak, oras ne’e membru Komisau F halo hela análiza, hafoin foti konkluzaun ikus maibé iha loron 12 fulan-agostu komisaun tenke aprova relatóriu no paresér.

Prezidente Komisaun F ne’e akresenta, projetu-lei ne’e iha artigu hamutuk 103 maibé posibilidade bele to’o artigu 137 no bele liu tan tanba iha alterasaun barak.

Entretantu bainhira iha loron 12 agostu mak Komisaun F aprova relatóriu no paresér sei haruka ba Prezidente Parlamentu Nasionál.

Hafoin entrega relatóriu no parser, Prezidente Parlamentu Nasionál sei halo ajendamentu liuhosi deziaun líder bankada parlamentár sira. Bainhira konferénsia reprezentante parlamentár aprova ajendamentu ne’e hafoin lori ba plenária hodi debate iha espesialidade, jeneralidade no finál globál.

Jornalista      : Evaristo Soares Martins

Editór            : Cancio Ximenes

HAKEREK NO HATÁN

Please enter your comment!
Please enter your name here