Komandante Komandu Operasionál Nasionál (KKON), Superintendente Xefe, Pedro Belo. Imajen/Eugénio Pereira.

DILI, 12 agostu 2021 (TATOLI)—Komandu Jerál Polísia Nasionál Timor-Leste (PNTL), orienta ona komandu munisípiu Bobonaro ho Covalima, atu reforsa Polísia Unidade Patrullamentu Fronteira (UPF), hodi kombate atividade ilegál iha fronteira.

“Komandu mantein planu estretéjiku ne’ebé hatún ona, no daudaun ne’e ekipa lubuk ida mak fó apoiu ba UPF hodi asegura liña fronteira,” Komandante Operasaun Nasionál, Superintendente Xefe, Pedro Belo, hateten ba jornalista-sira iha kuartél jerál PNTL, Caicoli, kinta ne’e.

Notísia relevante:Autoridade seguransa Indonézia deporta Timoroan 113 mai TL

Unidade-sira-sira iha koordenasaun diak tebes ho komandu munisípiu, hodi fó-apoiu másimu iha liña fronteira.

Tanba ne’e, ho aumentu númeru efetivu ne’ebé iha, bele kontrola liu-tán movimentu ilegál iha fronteira, atu bele prevene propagasaun COVID-19.

Parte komandu operasaun nasionál mós deskonfia katak, iha oknum UPF balun mak fasilita membru arte marsiál, hodi ba tuir ezame iha Atambua, no daudaun-ne’e komandu forma ona ekipa hodi loke prosesu investigasaun.

Antes ne’e, liuhosi operasaun Unidade Batalliaun Orden Públika (BOP), Komponente Operasaun Espesiál (COE), kaptura sidadaun sanulu resin ne’ebé mak hakat ilegál ba Indonézia.

Alende ne’e, autoridade seguransa Indonézia mós kaptura Timoroan 113 ne’ebé tama ilegál ba Indonézia, hodi deporta hikas ona mai territóriu nasionál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here