Autoridade seguransa Indonézia, deporta ona Timoroan 113 mai Timor-Leste, tersa (10/08/21). Imajen/foti hosi Facebook

BOBONARO, 11 agostu 2021 (TATOLI)—Autoridade imigrasaun no Polísia Repúblika Indonézia (POLRI) Kabupaten Belu, Atambua, Nusa Tenggara Timur (NTT), deporta ona Timoroan na’in 113 mai Timor-Leste (TL), iha tersa ne’e.

Autoridade Indonézia-nian halo deportasaun ba sidadaun hirak-ne’e iha tuku 15:00 0tl, tanba iha konkordánsia ho Konsuladu TL iha Atambua.

Notísia relevante:Autoridade seguransa Atambua detein Timoroan 113

“Kualkér sidadaun ne’ebé tama hosi estranjeiru, iha obrigasaun tuir regras ne’ebé mak estabelese ba perevensaun COVID-19. Sira sei tama hotu kuarentena,” Pontu vokál entrada postu Batugade, Superintendente, Emílio dos Santos, hateten ba jornalista-sira, iha postu integradu Batugade, postu administrativu Balibo, munisípiu Bobonaro.

PNTL halo ona identifikasaun ba sidadaun hirak-ne’e no intrega kedan ba parte saúde hodi submete ba prosesu kuarentena durante loron 14, iha fasilidade ne’ebé Governu prepara.

Bainhira kumpre ona kuarentena, parte saúde sei entrega hikas ba Servisu Investigasaun Kriminál Nasionál (SIKN), hodi loke prosesu investigasaun tuir lei ne’ebé vigora iha TL.

“Ita dentifika sidadaun hirak-ne’e, balun maihosi Baucau, Bobonaro, Liquiça, Covalima no munisípiu-sira seluk. Sira mai ho atributu arte marsiál balun,” nia espplika.

Prosesu integrasaun, akompaña hosi Konsuladu TL iha Atambua, João Simao Sousa no simu hosi komandante Serbisu Investigasaun Kriminál Nasionál (SIKN), Superintendente Xefe, José Neto Moc, Komandante UPF, Superintendente Xefe, Euclides Belo, Komandate munisípiu Bobonaro, Superintendente Antoninho Maluta, komandante Imigrasaun postu integradu Batugade no Autoridade munisipál Bobonaro.

Siddaun hirak-ne’e, Polísia Repúblika Indonézia kaptura iha área Hali-ulun no Fatubenao, Atambua, iha (09/08) tuku 21:00 oras Indonézia, hafoin hakat fronteira ilegalmente atu ba partisipa ezame arte marsiál.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here