Ministru Turizmu, Komérsiu no Indústria (MTKI), José Lucas do Carmo da Silva no Diretór Ezekutivu TIC Timor I.P, Roberto Caetano de Sousa Vicente, selebra akordu ba kolaborasaun servisu iha área informátika, iha salaun MTKI, Farol, segunda (26/07). Imajen/Espesiál

DILI, 26 jullu 2021 (TATOLI)Agência Tecnologia de Informação e Comunicação Timor, Institutu Públiku (TIC Timor, I.P) selebra akordu ho Ministériu Turizmu, Komérsiu no Indústria (MTKI) ba programa tolu.

Programa tolu ne’e kompostu hosi fornese no jere hosting website MTKI, dezeñu, dezenvolve no asegura sistema KoBoToolbox liuhosi https://kf.kobo.apps.gov.tl/accounts/login/ hodi kria formuláriu eletróniku tuir nesesidade no programa servisu email ofisiál ministériu (xxx@mtci.gov.tl) no website http://mtci.gov.tl/, ne’ebé eskopu servisu sei deskreve detalladamente iha Service Level Agreement (SLA).

Ministru Turizmu, Komérsiu no Indústria (MTKI), José Lucas do Carmo da Silva no Diretór Ezekutivu TIC Timor I.P, Roberto Caetano de Sousa Vicente, selebra akordu ba kolaborasaun servisu iha área informátika, iha salaun MTKI, Farol, segunda (26/07). Imajen/Espesiál

Ministru Turizmu, Komérsiu no Indústria (MTKI), José Lucas do Carmo da Silva, konsidera eventu ne’e hanesan indikadór hodi hakat pasu ida tan, tanba hamutuk ho TIC Timor bele aproveita fasilidade teknolojia ne’ebé eziste atu tulun ministériu ho ninia diresaun sira bele responsabiliza hosi diresaun nasionál peskiza no estatístika iha levantamentu dadus, jestaun baze dadus no publikasaun.

“Hanesan ministériu tékniku ida, iha kompeténsia no responsabilidade fundametál tebes ba promosaun Timor-Leste iha área ekonomia ho fundasaun metin, tanba ne’e MTKI presiza iha sistema no mekanizmu servisu ne’ebé funsiona ho di’ak atu asegura funsionamentu ne’e,” Ministru José Lucas, hateten iha edifísiu MTKI, Farol, segunda ne’e.

Nune’e, governante ne’e konsidera presiza iha rekursu umanu di’ak, tanba ne’e fortalesementu instituisaun hanesan parte ida hodi bele kapasita rekursu umanu, nune’e ministériu bele serví ho kualidade.

Lansamentu website MTKI, iha salaun MTKI, segunda (26/07). Imajen TATOLI/Francisco Sony

Ministru dehan, inisiativa ne’e hola parte hosi polítika boa governasaun, liga ba prosesu hamosu planu polítika ka desizaun ruma ne’ebé sei bazeia ba evidénsia no prontu atu partilla informasaun no simu sujestaun hosi parte hotu hodi hadi’a liután knaar MTKI.

Biban ne’e, governante ne’e husu ba Diresaun Nasionál Peskiza no Estatíska atu utiliza utiliza plataforma hirak ne’e ho profisionál ba instituisaun no Estadu ninia nesesidade, hodi serví ho di’ak ba públiku nia interese.

“Espera katak kooperasaun ne’e sei kontinua to’o diresaun nasionál ne’e bele to’o iha faze administra sistema ne’e rasik,” nia akresenta.

Parte ida hodi alkansa Governu Eletróniku

Iha fatin hanesan Diretór Ezekutivu TIC Timor I.P, Roberto Caetano de Sousa Vicente, konsidera eventu ne’e marka istória foun iha esforsu atu alkansa programa VIII Governu Konstitusionál hanesan Governu Eletróniku ka E-Government.

Ajénsia ne’e harii ho baze atu dezenvolve di’ak liután setór informasaun, komunikasaun no teknolojia hodi hafasil servisu ho kualidade di’ak liután ba sosiedade no hasa’e koñesementu, nune’e sei promove dezenvolvimentu sosiu ekonómiku, diversifikasaun ekonomia, bem-estar no kualidade moris sidadaun.

Diretór Ezekutivu TIC Timor I.P, Roberto Caetano de Sousa Vicente. Imajen TATOLI/Francisco Sony

“TIC Timor entende papél importante MTKI hanesan ministériu ne’ebé responsabiliza ba polítika iha setór turizmu, komérsiu no indústria hodi kontribui hasa’e atividade ekonomia inklui kompetividade iha nível nasionál no internasionál. Tanba ne’e, ami iha obrigasaun atu asegura polítika ministériu iha servisu informátika ne’ebé ami bele dezenvolve tuir nesesidade kurtu, médiu no longu prazu hodi fasilita di’ak liután prestasaun servisu ba komunidade,” Diretór Ezekutivu TIC Timor subliña.

Tanba ne’e, ajénsia ne’e komprometidu transforma servisu MTKI sai elektróniku liu hosi utilizasaun servisu teknolojia, informasaun no komunikasaun.

Foto hamutuk iha seremónia lansamentu website MTKI, iha salaun MTKI, Farol, segunda (26/07). Imajen TATOLI/Francisco Sony

Liuhosi kolaborasaun, MTKI mós sei kontribui ba esforsu TIC Timor hodi hamenus gastu deznesesáriu iha área informátika, sentraliza no asegura dokumentu no informasaun iha sentru dadus Governu Elektróniku, fasilita asesu ba padraun teknolojia no aplikasaun ne’ebé modernu, seguru, atualizadu, dezenvolvidu no asegura hosi timor-oan rasik.

Nune’e, ho entendimentu ne’e, MTKI hola parte ho ajénsia Estadu hamutuk 40-resin iha servisu informátika hosi  TIC Timor iha área oinoin.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here