Foos lokál hosi Maliana ne’ebé Ajénsia Kooperasaun Internasionál Japaun (JICA sígla inglés) konsidera di’ak liu iha Timor Leste (TL), kuarta (11/08/21). Imajen Tatoli/Sérgio da Cruz.

BOBONARO, 11 agostu 2021 (TATOLI)—Rezultadu teste laboratóriu ne’ebé Ajénsia Kooperasaun Internasionál Japaun (JICA sígla inglés), halo iha Japaun hatudu katak, foos lokál ne’ebé prodús hosi agrikultór-sira iha postu administrativu Maliana, munisipiu Bobonaro, provizoriamente di’ak liu, iha Timor-Leste (TL).

“2018 ami lori foos hosi Timor laran tomak ba halo teste laboratóriu iha Japaun, rezultadu hatudu katak, foos Maliana mak iha nutrisaun di’ak loos. Temporariamente foos Maliana diak liu iha TL,” reprezentante JICA hosi Dili, Henriques Gonsalves, hateten iha asembleia jerál, hodi hodi hili estrutura foun Sentru Atendimentu Agrikultór Kuda Ulun Bobonaro (CAACUB sígla portugés), iha jináziu munisipál Maliana, kuarta ne’e.

Notísia relevante:MAP fornese ona foos-rai tonelada tolu ba Loja Agrikultór

Estudu komparasaun kona-bá kualidade foos ne’e, kompostu hosi foos Maliana, Baucau, Manatuto no Rejiaun Administrativa Espesiál Oé-cusse Ambeno (RAEOA), inklui foos importadu ne’ebé faan iha Timor laran tomak.

“Rezultadu hatudu foos Maliana kompostu hosi sihera, nakroma no IR64 mak diak liu, tuir-kedan foos nakroma hosi RAEOA,” nia esplika.

Tanba  ne’e, husu agirkultór Maliana, atu servisu nafatin  ho badinas liu tan hodi hasa’e kuantidade produsaun hare, nune’e bele kompete iha merkadu nasionál no internasionál, ba kresimentu ekonomia iha rai-laran.

Parte JICA mós komprometidu atu fó apoiu ba agrikultór-sira hosi Maliana, liuliu fo asisténsia ténika atu moderniza agrikultór ne’ebe di’ak liu, hanesan ho nasaun dezenvolvidu sira, haree mós kondisaun irrigasaun, apoia ekipamentu no buka mekanizmu hasa’e folin foos iha merkadu.

Dadaun ne’e JICA halo ona promosaun ba foos lokál Maliana liuhosi jornál no televizaun, nune’e mundu tomak bele hatene, katak, kualidade foos iha TL mós hanesan ho nasaun dezenvolvidu-sira, maske sei adopta sistema agrikultúra tradisionál.

Durante ne’e JICA apoia ona agrikultór Maliana ne’ebé halibur-an iha CAACUB mak hanesan, adubu NPK 480 saka, Urea 240 saka, mákina baku hare hamutuk hitu, mákina ko’a hare iha ualu no mákina dulas hare ida.

Prezidente CAACUB foun, António Barreto da Conceiçao, rekoñese no konsidera foos lokál iha Maliana kualidade diak tanba agrikultór-sira hetan asisténsia téknika hosi péritu JICA, nune’e bainhira mai halo prosesamentu iha armazen CAACUB, sempre iha kuantidade boot no moos.

“Iha 2020 CAACUB distribui foos lokál Maliana tonelada 17 ba loja agrikultór iha Dili,” nia informa.

Tuir planu, tinan ne’e sei distribui tan ba merkadu ho kuantidade boot, tanba CAACUB hola ona hare-kulit tonelada 90 hosi agrikultór-sira.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here