Diretór Agro-Komérsiu no Kooperasaun Setór Privadu hosi MAP, Fernando Amaral. Imajen TATOLI/Cipriano Colo

DILI, 10 juñu 2021 (TATOLI)Diretór Nasionál Agro-Komérsiu no Kooperasaun Setór Privadu hosi Ministériu Agrikultura no Peska (MAP), Fernando Amaral, informa, parte ministériu fornese ona foos-rai tonelada tolu ba Loja Agrikultór iha Meimart Fatuhada no Timo Plaza, Dili.

“Agora daudaun ne’e foos-rai iha oituan ona, mai hosi agrikultór Uatulari, ne’ebé maka atu atende de’it konsumidór sira sosa saka ida ka rua nian,” Diretór informa ba Agência TATOLI, iha ninia knaar fatin, MAP, Comoro, kinta ne’e.

Tuir Diretór ne’e, semana ida tan bele iha foos barak ona tanba Asosiasaun Agrikultór Cakuk hosi Maliana komunika ona ba MAP atu fornese foos-rai ba Loja Agrikultór.

“Sira prepara hare to’o tonelada 100 no sira sei prosesa hela, espera katak sira hahú halo prosesu no semana oin sira bele lori mai ona,” nia akresenta.

Fulan ne’e ramata, MAP mós sei komunika ho  asosiasaun Grupu Agrikultór Webaba hodi fornese foos-rai ba Loja Agrikultór sira iha Dili.

MAP hamutuk ho parseiru lansa Loja Agrikultór iha 06 juñu 2019, ho hanoin ida atu halo koneksaun entre agrikultór no merkadu, tanba maioria povu Timór envolve-an iha atividade agrikultura, maibé iha dezafíu atu hetan oportunidade asesu merkadu atubele fa’an produtu.

Tanba ne’e, estabelese Loja Agrikultór, ne’ebé fa’an produtu agríkola hosi asosiasaun agrikultór iha munisípiu 12 hanesan foos lokál (foos mutin, mean no metan), modo, ai-fuan fresku, fore, kafé no seluk tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here