Autoridade seguransa Indonézia, deporta ona Timoroan 113 mai Timor-Leste, tersa (10/08/21). Imajen/foti hosi Facebook

DILI, 11 agostu 2021 (TATOLI)- Forum Organizasaun Naun Governamentál Timor-Leste (FONGTIL), kuarta ne’e, hala’o enkontru ho Vis- Ministru Interiór, António Armindo, iha Vila-Verde, Dili, hodi aprezenta sira-nia rekomendasaun ba Governu atu kriminaliza abitante ne’ebé kontinua halo viajen ilegál liuhosi fronteira terrestre.

Notísia Relevante : Timor-oan 113 sei submete ba investigasaun no selu koima

Diretór Ezekutivu FONGTIL, Daniel Santos do Carmo afirma Governu presiza kriminaliza abitante ne’ebé kontinua halo viajen ilegál tanba tuir lei Estadu Emerjénsia katak ema ne’ebé halo viajen ilegál ne’e multa hahú hosi osan montante $30.00 to’o $ 250.00, maibé multa koima de’it la to’o no ema la ta’uk kontinua halo viajen ilegál, tanba ne’e oinsá mak kriminaliza tuir kódigu penál artigu 244 krime obedese ne’e ninia pena dura tinan rua to’o tinan neen.

“Ami hato’o rekomendasaun prinsipál ba Vise-Ministru Interiór oinsá hamutuk ho Komandante Polísia Nasionál Timor-Leste (PNTL) atu hola desizaun sériu ba oknum PNTL ne’ebé fasilita abitante balu kontinua halo viajen ilegál ba Indonézia tanba arte marsiál,” Daniel Santos do Carmo informa ba jornalista-sira hafoin hala’o enkontru ho Vise Ministru Interiór.

Nia hatutan, tanba ema ne’ebé halo viajen ilegál ne’e iha situasaun COVID-19 agora ne’e ameasa ba soberania.

Atu evita pasajen ilegál ne’e la’ós forsa hotu-hotu deskola ba fronteira terrestre, maibé tuir Daniel do Carmo, oinsá mak Ministériu Interiór hamutuk ho Ministériu Negósiu Estranjeiru no Kooperasaun (MNEK) komunika ho autoridade sira iha Indonézia sira mós tenke responsabiliza tanba sá mak iha situasaun COVID-19 nia-laran atividade arte marsiál sira kontinua la’o.

Vise-Ministru Interiór António Armindo rasik simu ona rekomendasaun sira ne’e no sei tau konsiderasaun tanba rekomendasaun hosi sosiedade sivíl ne’e ajuda tebes Estadu.

Vise-Ministru Interiór mós husu oinsá sosiedade sivíl bele halo advokasia ida ba entidade sira liuliu Parlamentu Nasionál oinsá orsamentu ne’ebé tau ba PNTL ne’e labele diskute nune’e bele halo dezenvolvimentu ne’ebé iha instituisaun PNTL nian.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here