Vise-Ministru Interiór, António Armindo. Imajen TATOLI/Francisco Sony

DILI, 10 agostu 2021 (TATOLI)–Vise-Ministru Interiór, António Armindo, informa, Autoridade Seguransa Indonézia deporta ona timor-oan hamutuk na’in-113, ne’ebé tenta hakat fronteira terrestre liu dalan ilegál bá Atambua, iha segunda (09/08) kalan, hodi tuir seremónia arte-marsiál.

“Kona-ba medida rigorozu, papel seguransa mak kaptura hodi entrega ba Ministériu Públiku hodi halo investigasaun, nune’e prosesu ne’e kompeténsia Ministériu Públiku,” Vise-Ministru Interiór relata hafoin enkontru ho Primeiru-Ministru (PM), Taur Matan Ruak, iha Rezidénsia Farol, tersa ne’e.

Maski nune’e, tanba daudaun Timor-Leste aplika Estadu Emerjénsia ligadu ho COVID-19, maka Governu sei aplika koima ba sidadaun ne’ebé dezobidiénsia bazeia ba Dekretu Governu númeru 9/2021 iha artigu 7, ho montante mínimu $30 no másimu $250, maibé sidadaun sira ne’e sei kumpre kuarentena durante loron 14 hafoin investiga no aplika koima.

Tuir governante ne’e, sidadaun hirak ne’e deporta ona mai fronteira Batugade hodi lori mai submete ba kuarentena iha Dili.

Notísia relevante: Governu komunika ona autoridade Indonézia deporta timor-oan 113

Aleinde ne’e, durante halo diskusaun, Xefe Governu agradese serbisu Polísia Nasionál Timor-Leste (PNTL) destakadu iha fronteira, ne’ebé halo operasaun asegura pasajen ilegál, inklui autoridade seguransa Indonézia ne’ebé halo kooperasaun di’ak ho parte seguransa Timor-Leste nu’udar nasaun viziñu.

“Primeiru-Ministru husu nafatin halo koordenasaun entre autoridade seguransa Timor-Leste no Indonézia hodi mantein kontrola, nune’e bele kaptura ema sira halo pasajen ilegál hakat fronteira terrestre,” nia hatutan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here